Kaspıı teńiziniń jaǵalaýynda ornalasqan 50 ga jer memleketke qaıtaryldy
ASTANA. KAZINFORM – Kelip túsken ótinish negizinde Mańǵystaý oblysynyń jer resýrstaryn basqarý departamenti jaýapkershiligi shekteýli seriktestikke qatysty jospardan tys tekserý júrgizdi.
Nátıjesinde munaı termınalynyń qurylysyn salý jáne ornalastyrýǵa arnalǵan jalpy aýdany 50,0 gektar jer ýchaskesi uzaq ýaqyt boıy nysanaly maqsaty boıynsha paıdalanylmaı kelgeni anyqtaldy.
«Kadastrlyq (baǵalaý) quny — 445 mln teńgeni quraıtyn jer ýchaskesi Kaspıı teńiziniń jaǵalaýyndaǵy Qaraqııa aýdanynda ornalasqan.
Jer ýchaskesiniń menshik ıesine jer zańnamasynyń talaptaryn buzýshylyqtardy joıý týraly nusqama berildi. Jyl aıaqtalǵannan keıin nusqama talaptaryn oryndamaǵany úshin seriktestikke 345 myń teńge kóleminde aıyppul túrindegi ákimshilik shara qoldanyldy», — dep jazdy Aýyl sharýashylyǵy mınıstrliginen.
Sonymen qatar departamenttiń jer ýchaskesin memleket menshigine májbúrlep alyp qoıý týraly talap-aryzy sotpen qanaǵattandyrylyp, sot sheshimi zańdy kúshine endi.
