Kaspıı teńiziniń jaǵalaýynda mobıldi beketter ornatyldy
AQTAÝ. KAZINFORM – Shomylý maýsymy qarsańynda Aqtaýdaǵy Kaspıı teńiziniń jaǵalaýyndaǵy tanymal demalys aımaqtaryndaǵy akvatorııanyń túbine zertteý júrgizildi. Shomylýǵa arnalǵan Qaýipsiz ýchaskeler anyqtaldy, jaǵajaılar tazartyldy, sýda júris-turys erejeleri bar eskertý belgileri men aqparattyq qalqandar ornatyldy.
Aqtaý men onyń mańaıyndaǵy aýdandarda qutqarýshylardyń mobıldi beketteri ornatyldy. Barlyq qajetti zatpen: qutqarý sheńberlerimen, qaıyqtarmen, baılanys quraldarymen jáne dári qobdıshalarymen qamtamasyz etilgen qutqarý qyzmetteriniń qyzmetkerleri teńiz jaǵalaýynda kezekshilik etedi. Kúndelikti patrýlder ótkiziledi.
Qutqarýshylar men volonterler halyq arasynda túsindirý jumystaryn júrgizedi. Teńiz jaǵasynda qaýipsiz demalý úshin jadnamalar men býkletter taratylady. Mektepterde, aýla klýbtarynda jáne lagerlerde balalarmen taqyryptyq sabaqtar ótkiziledi.
Kúshti aǵyndarǵa, tolqyndarǵa, tastarǵa nemese tik jaǵalaýlarǵa baılanysty shomylýǵa tyıym salynǵan jerlerde reıdter uıymdastyryldy. Sýda júris-turys erejelerin buzýshylarǵa eskertý jasalady, kámeletke tolmaǵandardyń ata-analarymen áńgimeler júrgiziledi.
Shaǵyn kólemdi kemelerdiń ıelerine arnalǵan nusqaýlyqtar únemi ótkizilip turady. Qutqarý keýdeshelerin kııý jáne akvatorııaǵa shyǵý erejelerin saqtaý máselelerine erekshe nazar aýdarylady.
Jaǵalaý aýmaqtary eki qalany — Aqtaý men Jańaózendi, sondaı-aq Qaraqııa jáne Túpqaraǵan aýdandaryn qamtıdy. Osy eldi mekenderdiń árqaısysynda Mańǵystaý oblysy TJD jedel-qutqarý jasaǵynyń sýdaǵy tótenshe jaǵdaılarǵa patrýldeýge, aldyn alýǵa jáne den qoıýǵa jumyldyrylǵan qutqarý bólimsheleri bar.
Aqtaý aýdanyndaǵy Kaspıı teńizi akvatorııasynyń erekshelikteri: jaǵalaýǵa jaqyn tereńdiktiń kúrt ózgerýi; sýasty aǵyndarynyń bolýy; daýyldy aýa-raıynda shomylý kezindegi qaýip; shomylýǵa tyıym salynǵan tehnıkalyq obektiler men sý burǵyshtardyń bolýy.
Eske sala keteıik, buǵan deıin Aqtaýda Kaspıı teńizine Qyzyl kitapqa engen albyrt shabaqtary jiberilgenin jazǵan edik.