Kaspıı teńiziniń túbine optıka tóseýge 1 100 tonna kabel qajet
ASTANA. KAZINFORM — Kaspıı teńiziniń túbine optıka tóseý úshin 1 100 tonna kabel qajet. Bul týraly búgin Úkimet otyrysynda «Qazaqtelekom» AQ basqarma tóraǵasy Baǵdat Mýsın aıtty.
Onyń aıtýynsha, Kaspıı teńiziniń túbine optıka tóseý jobasy boıynsha teńiz arqyly Aqtaý–Sýmgaıt baǵytynda sýasty talshyqty-optıkalyq jelini salý josparlanǵan.
Onyń uzyndyǵy shamamen 370 shaqyrym bolady. Naqty uzyndyǵy teńizde jobalaý-izdestirý nátıjesinde anyqtalady.
Kem degende 32 optıkalyq talshyq salý kózdelgen. Jeliniń maksımaldy ótkizý qabileti — sekýndyna 400 terabıtke deıin.
«Sýasty talshyqty-optıkalyq jeliniń maqsaty: Qazaqstan men Ortalyq Azııa elderi úshin ınternetke qatynaýdyń jańa baǵyty; Qytaı-Eýropa, Ortalyq Azııa-Eýropa, Qazaqstan-Eýropa halyqaralyq tranzıtine arnalǵan marshrýt. Jobada kabeldiń 2 túrin paıdalanamyz: qosarly brondalǵan kabel (DA — Double Armoured); bir ret brondalǵan kabel (SA — Single Armoured). Kabeldi Qytaıdaǵy zaýyttan Kaspıı teńizine jetkizýdiń 2 baǵytyn qarastyrdyq. Birinshi baǵyt: Qytaı-Túrkııa-Qara teńiz-Edil-Don kanaly-Aqtaý. Bul baǵytqa shamamen 98 kún qajet. Ekinshi baǵyt: Qytaı-Eýropa-Reseı-Edil ózeni-Aqtaý. Bul baǵytqa shamamen 100 kún kerek», — dedi Baǵdat Mýsın.
Qazaqtelekom basshysy kabeldi Qytaıdaǵy zaýyttan Kaspıı teńizine avtojoldar arqyly jetkizýge de múmkindik bar ekenin aıtady.
«Ol úshin arnaıy tral kerek. Kabeldiń jalpy salmaǵy shamamen 1 100 tonna, ony 4 korzınaǵa bólý qajet. Árbir korzınanyń salmaǵy shamamen 230-295 tonna. Sondyqtan barlyǵy 4 bólek tral kerek bolady. Korzınanyń ólshemderi: eni — 5-6 metr, uzyndyǵy — 14 metr, bıiktigi — 4 metr. Ruqsat qujattaryn alýdy sanaǵanda avtojol arqyly jetkizý shamamen 150 kúndi alady. QazAvtoJol jáne QazJolǴZI mekemelerimen daıyndyq jumystaryn bastadyq. Avtojol arqyly jetkizý úshin arnaıy ruqsat alý qajet bolady», — dedi ol.
