Kaspıı teńiziniń sý bıoresýrstary jónindegi komıssııaǵa Ázerbaıjan tóraǵalyq etedi

ASTANA. KAZINFORM — 2027 jylǵy 1 qańtardan bastap Ázerbaıjan Kaspıı teńiziniń sý bıoresýrstary jónindegi komıssııaǵa eki jyl tóraǵalyq etedi. Bul qyzmette el Túrikmenstandy almastyrady, dep habarlaıdy Kazinform agenttiginiń menshikti tilshisi Report.az basylymyna silteme jasap.

a
Foto: Welcome.kz

Bul týraly Túrikmenstan Kaspıı teńizi ınstıtýtynyń dırektory Murat Atadjanov Bakýde ótken akvakýltýra jónindegi I Ázerbaıjan óńirlik forýmynyń paneldik sessııasynda málimdedi.

Onyń aıtýynsha, Túrikmenstan komıssııaǵa 2025-2026 jyldary tóraǵalyq etip keledi. Uıymnyń onynshy otyrysy bıyl jeltoqsanda ótedi dep josparlanǵan. Al 2027 jyldyń basynan bastap komıssııa basshylyǵy 2027-2028 jyldarǵa Ázerbaıjanǵa ótedi.

Murat Atadjanov bul tóraǵalyq Ázerbaıjanǵa akvamádenıet salasyndaǵy óńirlik kún tártibin ilgeriletýge múmkindik beretinine senim bildirdi.

Kaspıı teńiziniń sý bıoresýrstary jónindegi komıssııa 1992 jyly Ázerbaıjan, Reseı, Qazaqstan jáne Túrikmenstannyń bastamasymen qurylǵan. 2002 jyly onyń jumysyna Iran da qosyldy.

Aıta keteıik, buǵan deıin Qazaqstan men Ázerbaıjan Kaspıı teńizi arqyly vagondardy júk túsirip, qaıta tıeýsiz tasymaldaýǵa múmkindik beretin «Kaspıı kópiri» jobasyn júzege asyratynyn jazǵanbyz. Jańa júıe arqyly jylyna 8 mln tonna júk tasymaldaý, keıin kólemdi 12 mln tonnaǵa deıin jetkizý josparlanyp otyr.