Kaspıı teńiziniń soltústik bóliginde ıtbalyq kúshiktep jatyr
ATYRAÝ. KAZINFORM — Kaspıı teńiziniń qazaqstandyq sektoryna jatatyn soltústik bóligindegi muzdyń qalyńdyǵy — 16 sm. Teńizdiń Qulaly jáne Qalamqas aralynda ıtbalyqtyń kúshiktegeni anyqtaldy.
Balyq sharýashylyǵy komıteti baspasóz qyzmetiniń aqparatyna súıensek, Kaspıı ıtbalyǵy – bes elge ortaq teńiz faýnasyndaǵy sútqorektilerdiń jalǵyz túri. Itbalyq balyqty, onyń ishinde maıshabaqty, buzaýbas, aterına, sondaı-aq mollıýska men asshaıanyn qorek etedi.
«Kaspıı ıtbalyǵy teńizdiń soltústik akvatorııasyn jáne ortalyq jaǵalaýyn mekendeıdi. Maýsymdyq mıgratsııa kezinde teńizdiń Túrkimenstanmen shekarasynan Qazaqstandaǵy jaǵalaýdy qosa alǵanda Jaıyq ózeniniń saǵasyna deıingi aýmaqqa júzip shyǵady. Italbyqtyń ońtústik jáne orta teńizden soltústik bólikke mıgratsııasy qarasha aıynda aıaqtalady. Ony Kaspııdiń soltústik-shyǵysynan da kezdestirýge bolady. Jeltoqsannyń sońyna deıin teńizdiń Komsomolets shyǵanaǵynan Jaıyq ózeniniń atyrabyna deıingi soltústik-shyǵys bóliginiń taıaz aýmaǵyn mekendeıdi. Bul aýmaq ıtbalyqtyń mıgratsııasyna, qorektenýi men demalýyna qolaıdy», - dep habarlady komıtettiń baspasóz qyzmeti.
Qys maýsymynda ıtbalyq Soltústik Kaspııdiń batys jáne shyǵys bóligin, ortalyq akvatorııasyn meken etedi. Qańtar-naýryz aılarynda ıtbalyqtyń kóbeıýi, qorektenýi, juptasýy men túleýi Soltústik Kaspııdiń muz qatqan bóligi men araldarynda ótedi. Analyq daraqtar kúshikteý jáne kúshikterdi qorektendirý úshin muzǵa keledi. Analyq daraq bir kúshikti, sırek jaǵdaıda ekeýin dúnıege ákeledi. Itbalyqtyń kúshikteýi qańtardyń ekinshi jartysynda bastalǵan.
«Teńizdegi muz 2023 jylǵy jeltoqsannyń ekinshi onkúndiginen qata bastady. «Qazgıdromet» RMK-nyń teńizdegi stantsııalary men beketteriniń ǵaryshtyq sýretterine, jedel derekterine sáıkes, Kaspııdiń soltústik jaǵalaýynda muz qalyńdyǵy 16 sm-ge deıin jetken. Muzdyń bul qalyńdyǵy kaspıı ıtbalyqtarynyń kóbeıýine qolaıly ahýal qalyptastyrdy. Jaıyq-Kaspıı oblysaralyq basseındik balyq sharýashylyǵy ınspektsııasynyń qyzmetkerleri 26 qańtardan beri Kaspıı ıtbalyǵyny monıtorıng júrgizdi. Aqpannyń 7-si kúngi jaǵdaı boıynsha Qulaly, Qalamqas aralynda ıtbalyqtardyń kúshikteri anyqtaldy. Teńiz janýarynyń arasynan aýrý, ne álsizi kezdesken joq. Itbalyqtardyń jappaı kúshikteýi 10-25 aqpan aralyǵynda ótedi», - dep málim etti komıtettiń baspasóz qyzmetinen.
Eske sala ketelik, budan buryn Soltústik Kaspııde muz qalyńdyǵy birkelki bolmaýynan kúshikterine qaýip tónip turǵanyn jazǵan edik.
