Kaspıı teńiziniń soltústiginde sý qaıtyp, teńiz túbi kórine bastady
ASTANA. KAZINFORM — Kaspıı teńiziniń soltústik bóliginde, Qulaly aralyna jaqyn mańda jańa qurlyq bólikteri paıda bolǵany anyqtaldy. Bul qubylystyń sebebin Ekologııa jáne tabıǵı resýrstar mınıstrligi túsindirdi.
Mınıstrliktiń málimetinshe, Qazaq Kaspıı teńizi ǵylymı-zertteý ınstıtýtynyń mamandary 2021–2026 jyldar aralyǵynda túsirilgen spýtnıktik sýretterdi salystyryp, teńiz jaǵalaýyndaǵy ózgeristerdi zerttegen. Nátıjesinde Rybachıı túbeginiń batysynda jáne Qulaly aralynyń shyǵysynda (Túlen araldary arhıpelagy) teńiz sýy tartylyp, qurlyqqa aınalǵan jańa aýmaqtar anyqtalǵan.
— Spýtnıktik sýretter 2021 jyldan 2026 jylǵa deıin teńiz jaǵalaýyndaǵy ózgerister jyl saıyn kúsheıe túskenin kórsetedi. Jańadan paıda bolǵan qurlyq bólikteriniń naqty aýmaǵy ázirge eseptelgen joq. Degenmen bul ózgerister Kaspıı teńiziniń taıazdanýymen baılanysty, — delingen mamandardyń esebinde.
Zertteý nátıjesine súıensek, Qulaly gıdrologııalyq beketi mańynda Kaspıı teńiziniń deńgeıi birneshe jyl boıy tómendep kelgen. Sonyń saldarynan buryn sý astynda jatqan aýmaqtar birtindep qurǵaı bastaǵan.
Máselen, 2021 jyly teńizdiń ortasha jyldyq deńgeıi Baltyq bıiktik júıesi boıynsha 28,31 metr bolǵan. Sol jyly Rybachıı túbeginiń batysynda teńiz túbiniń alǵashqy bólikteri kórine bastaǵan.
2022 jyly sý deńgeıi 28,57 metrge deıin tómendep, qurǵaǵan aýmaqtardyń shekarasy aıqyndala túsken. Al 2023 jyly bul kórsetkish 28,99 metrge jetip, spýtnıktik sýretter Rybachıı túbeginiń batysynda jańa qurlyq bólikteriniń paıda bolǵanyn kórsetken.
2024 jyly teńiz deńgeıi 29,37 metrge deıin tómendegen. Sonyń nátıjesinde sý astynda jatqan aýmaqtardyń odan ári qurǵaǵany baıqalǵan. 2025 jyly sý deńgeıi 29,30 metr bolǵanymen, Rybachıı túbeginiń batysyndaǵy qurǵaǵan teńiz túbiniń aýmaǵy ulǵaıa túsken.
Qulaly aralyndaǵy gıdrologııalyq bekettiń dereginshe, 2026 jyldyń shildesinde teńiz deńgeıi 29,42 metrge jetken. Bul — zertteý kezeńindegi eń tómen kórsetkish. Degenmen bıyl túsirilgen spýtnıktik sýretterde ótken jylmen salystyrǵanda aıtarlyqtaı ózgeris baıqalmaǵan.
Aıta keteıik, buǵan deıin Memleket basshysy Kaspıı ekologııa sammıtinde Kaspıı teńiziniń tartylýyna qarsy memleketaralyq baǵdarlama ázirleýdi usynǵany habarlandy.
