Kaspıı teńiziniń qurǵaǵan alqaptarynda galofıtti ósimdikter egilýi múmkin
ASTANA. KAZINFORM – Kaspıı teńiziniń qurǵaǵan alqaptarynda galofıtti ósimdikter egilýi múmkin. Bul týraly Májilis depýtattarynyń saýalyna Premer-Mınıstr Oljas Bektenovtiń jaýabynda aıtylǵan.
«2021 jyly Memleket basshysy ekologııalyq jaǵdaıdy jaqsartý maqsatynda 2025 jylǵa deıin Aral teńiziniń qurǵaǵan túbinde sekseýil ekpelerin otyrǵyzý jolymen jalpy aýdany 1,1 mln gektar orman melıoratsııalyq jumystardy júrgizý mindetin qoıdy. 2021 jyldan bastap 2024 jylǵa deıin Aral teńiziniń qurǵaǵan túbinde 413 myń gektar alqapta orman melıoratsııalyq jumystar oryndaldy. Ekologııalyq apattyń teris áserin azaıtýdyń, tuzdardy shyǵarýǵa qarsy borpyldaq tuzdy qabatyn nyǵaıtýdyń jáne jyljymaly qumdarmen kúresýdiń eń qolaıly ádisi - baıyrǵy ósimdikterdiń qurǵaǵan túbine orman ósirý. Sekseýildiń ómir súrýin barynsha arttyrý úshin orman melıoratsııalyq jumystar ǵylymı usynymdar men jumys jobalary negizinde júrgiziledi», - dedi Úkimet basshysy jaýabynda.
Onyń atap ótýinshe, ǵalymdar tuzy az topyraqtarda sekseýil egýdi (otyrǵyzýdy), neǵurlym tuzdy topyraqtarda galofıtti ósimdikterdiń (qarabaq, sarasazan) tuqymdaryn sebýdi usynyp otyr.
«Bul rette Kaspıı teńiziniń qurǵaǵan alqaptarynda erozııaǵa qarsy sharalar qabyldaý úshin Ekologııa jáne tabıǵı resýrstar mınıstrligi «Á.N.Bókeıhan atyndaǵy Qazaq orman sharýashylyǵy jáne agroorman sharýashylyǵy ǵylymı-zertteý ınstıtýty» JShS 2025-2027 jyldarǵa arnalǵan baǵdarlamalyq-nysanalyq qarjylandyrý aıasynda Kaspıı teńiziniń qurǵaǵan alqaptarynda galofıtti ósimdikterdi egý boıynsha ǵylymı-zertteý jumystaryn júrgizýdi qarastyrdy», - dedi ol.
Eske sala keteıik, buǵan deıin 2006 jyldan bastap Kaspıı teńiziniń ortasha deńgeıiniń tómendeý úrdisi baıqalatynyn jazǵan edik.
