Kaspıı teńiziniń qaýipsizdigin jaǵalaýdaǵy memleketter ózderi qamtamasyz etýi tıis — Iran elshisi
ASTANA. KAZINFORM — Kaspıı teńizindegi qaýipsizdikti tek jaǵalaýdaǵy memleketter qamtamasyz etýi tıis. Bul týraly Iran Islam Respýblıkasynyń Qazaqstan Respýblıkasyndaǵy Tótenshe jáne ókiletti elshisi Alı Akbar Djoýkar málimdedi.
Onyń aıtýynsha, Kaspıı teńizine shektes barlyq memleket teńizdegi qaýipsizdikti ózderi qamtamasyz etý jóninde ortaq pikirde.
— Kaspıı óńiri bul turǵyda Parsy shyǵanaǵynan erekshelenedi. Sebebi Parsy shyǵanaǵynda AQSh-tyń qatysýy bar jáne bul aımaqtaǵy elderdegi jaǵdaıdyń turaqsyzdanýyna yqpal etedi. Al Kaspıı teńizinde jaǵalaýdaǵy bes memlekettiń birlesken kúsh-jigeriniń arqasynda teńizdegi qaýipsizdik tolyq qamtamasyz etilip otyr, — dedi elshi.
Sondaı-aq ol Kaspıı teńizi akvatorııasynda basqa memleketterdiń áskerı qatysýyna jol bermeý máselesinde bes eldiń ustanymy ortaq ekenin atap ótti.
Buǵan deıin Alı Akbar Djokýar Qazaqstan úshin qazirgi ýaqytta eshqandaı qaýip-qater joq. Alaıda bolashaqta Ortalyq Azııa aımaǵy úshin belgili bir qaýip tónýi múmkin degen edi.
