Kaspıı teńiziniń ekologııalyq monıtorıngine arnalǵan jańa tehnologııa ázirlenip jatyr
ASTANA. KAZINFORM — Ázirlenip jatqan júıe munaı uńǵymalarynan, sorǵy stantsııalarynan, tehnologııalyq jabdyqtardyń datchıkterinen, esepke alý qurylǵylarynan jáne ónerkásiptik ınfraqurylymnyń ózge de nysandarynan derekterdi jınap, olardy berýge múmkindik beredi.
Memleket basshysynyń jasandy ıntellektini damytý jáne tsıfrlyq ekonomıka úshin kadrlar daıarlaý jónindegi tapsyrmalaryn iske asyrý aıasynda elimizde jasandy ıntellekt, ınjenerlik ázirlemeler jáne tehnologııalyq kásipkerlik ekojúıesin qalyptastyrýǵa baǵyttalǵan zamanaýı bilim berý, ǵylymı jáne tehnologııalyq jobalardy júıeli túrde júzege asyrylyp keledi.
Atalǵan baǵyttaǵy memlekettik saıasatty iske asyrýdyń negizgi tetikteriniń biri – Prezıdent tapsyrmasymen Ǵylym jáne joǵary bilim mınıstrligi bastamashylyq etken AI-Sana ulttyq baǵdarlamasy. Baǵdarlama jasandy ıntellekt salasyndaǵy quzyretterdi damytýǵa, stýdentter men jas zertteýshilerdiń ınnovatsııalyq jobalaryn qoldaýǵa, sondaı-aq ekonomıkanyń strategııalyq mańyzdy salalaryna ozyq tehnologııalardy engizýge baǵyttalǵan.
Qazirgi ýaqytta munaı-gaz salasy nysandaryn, ónerkásiptik ınfraqurylym men ekologııalyq júıelerdi qashyqtan baqylaýǵa arnalǵan LoRaWAN tehnologııasyn qoldaıtyn otandyq baǵdarlamalanatyn logıkalyq kontroller (PLC) ázirlenip jatyr. Bul tehnologııa energııany barynsha únemdeı otyryp, derekterdi alys qashyqtyqqa jetkizýge múmkindik beredi. Bul ásirese óndiristik nysandary bir-birinen edáýir qashyq ornalasqan Mańǵystaý óńiri úshin asa ózekti.
Ázirlenip jatqan júıe munaı uńǵymalarynan, sorǵy stantsııalarynan, tehnologııalyq jabdyqtardyń datchıkterinen, esepke alý qurylǵylarynan jáne ónerkásiptik ınfraqurylymnyń ózge de nysandarynan derekterdi jınap, olardy berýge múmkindik beredi.
Jınalǵan aqparat SCADA jáne tehnologııalyq protsesterdi avtomattandyrylǵan basqarý júıelerine (ASÝ TP) biriktirilip, óndiristik úderisterdi naqty ýaqyt rejıminde baqylaýdy qamtamasyz etedi.
Ázirlenip jatqan júıe tek ónerkásip salasynda ǵana emes, ekologııalyq monıtorıng mindetterin sheshýde de qoldanýǵa baǵyttalǵan.
Jobanyń mańyzdy baǵyttarynyń biri – Kaspıı teńiziniń ekologııalyq jaı-kúıin baqylaý. LoRaWAN jelisine qosylǵan datchıkter sýdyń temperatýrasyn, tuzdylyq deńgeıin, rN kórsetkishin, laılylyǵyn jáne qorshaǵan ortanyń basqa da parametrlerin baqylaýǵa múmkindik beredi. Bul ekologııalyq derekterdi jedel jınaý men taldaýdy qamtamasyz etedi.
Atalǵan bastamany iske asyrý óńirdiń munaı-gaz keshenin tsıfrlandyrýǵa, joǵary tehnologııalyq ónimderdiń otandyq óndirisin damytýǵa, ımportty almastyrýǵa jáne Qazaqstannyń tehnologııalyq táýelsizdigin nyǵaıtýǵa yqpal etedi.
Aıta ketelik Kaspıı máselelerin zertteıtin ǵylymı fılıal ashý usynylǵany týraly jazǵan edik.
