Kaspıı teńiziniń Aqtaýdaǵy jaǵalaýyn muz basty

Qatty aıazdyń saldarynan Kaspıı teńiziniń Aqtaýdaǵy jaǵalaýyn 2 santımetrge deıin muz basty. Al tótenshelikter adamnyń qaýipsiz qozǵalysy úshin muzdyń qalyńdyǵy kem degende 10 santımetr bolýy keregin aıtyp, turǵyndardy muzdyń ústine shyqpaýǵa shaqyrdy, dep habarlaıdy Kazinform.

«2 sanımetr muz adamnyń salmaǵyn kótere almaıdy. Sondyqtan muzǵa jeke, toppen nemese kólikpen shyǵýǵa bolmaıdy. Sondaı-aq balalardy teńiz jaǵalaýyna barǵanda qaraýsyz qaldyrmaý kerek», - delingen Mańǵystaý oblysy Tótenshe jaǵdaılar departamentiniń baspasóz qyzmetinen. 

Sonymen qatar mamandar sý aıdyndarynda qaýipsizdik erejelerin buzǵan azamattarǵa QR Ákimshilik quqyqbuzýshylyq kodeksiniń 412 jáne 364-baptary boıynsha jaýapkershilik kózdelgenin eskertip otyr.