Kaspıı teńizine balyq aýlaýǵa shyqqan eki azamat iz-túzsiz joǵaldy
AQTAÝ. KAZINFORM – Mańǵystaý oblysynda Kaspıı teńizine balyq aýlaýǵa shyqqan eki adam joǵalyp ketti.
Atalǵan oqıǵa eki buryn bolǵan. Óńirge qarasty Túpqaraǵan aýdanynyń eki turǵyny Fort Shevchenko qalasynan Qyzyl Ózen aýyly baǵytyna qaraı ashyq teńizge qaıyqpen shyqqan kúıi qaıtyp oralmaǵan.
Mańǵystaý oblysynyń Tótenshe jaǵdaılar departamenti Tótenshe jaǵdaılardy joıý basqarmasy bastyǵynyń mindetin atqarýshy, azamattyq qorǵaý aǵa leıtenanty Pirimjan Dinmuhammedtiń aıtýynsha, qazirgi kezde eki azamatty izdeýdiń keshendi jumystary júrgizilip jatyr.
«3 sáýir kúni saǵat tańǵy 07:40 shamasynda Túpqaraǵan aýdanynyń ortalyǵy Fort Shevchenko qalasynan Qyzyl Ózen aýyly baǵytyna qaraı Úrdek (Asan) teńiz jaǵasynan shamamen 25-30 shaqyrym qashyqtyqta 1985 jáne 1982 jyly týǵan 2 er adam shyqqan. Eki azamat ashyq teńizge túngi 22 saǵat 30 mınýt shamasynda úrlemeli qaıyqpen balyq aýlaýǵa ketip oralmany týraly Tótenshe jaǵdaılar departamentine habarlama kelip tústi. Aqparatqa sáıkes eki azamatta balyq aýlaý tory bolǵan. Shaqyrtý túsken sátten bastap izdestirý-qutqarý jumystary bastalyp, júrgizilip jatyr. Biraq ázirge nátıje joq. Búgingi kúni izdestirý-qutqarý jumystaryna Mańǵystaý oblysynyń Tótenshe jaǵdaılar departamenti jeke quramynan 13 adam, 4 birlik tehnıka, 3 birlik júzý quraly, 1 birlik ushqyshsyz ushý apparaty, UQK Shekara qyzmetinen 21 áskerı qyzmetker, 1 keme, «Qazavıaqutqarý» AQ 3 adam, 1 birlik Mı-8 tik ushaǵy jumyldyryldy», - dedi Pirimjan Dinmuhammed.
Buǵan deıin Mańǵystaý oblysynyń Túpqaraǵan aýdanynda teńiz jaǵalaýynan ıtbalyqtardyń óleksesi tabylǵan bolatyn. Keıin olardyń sany 62-den 78-ge deıin kóbeıgeni málim boldy. Qazirgi ýaqytta teńiz janýarlarynyń qyrylý sebebi zerttelip jatyr.
