Kaspıı teńizindegi D araly mańynda tornado bolǵan ba

ATYRAÝ. KAZINFORM – Kaspıı teńiziniń qazaqstandyq sektoryndaǵy D araly mańynda tornado bolǵan.

Pace Analytics Telegram arnasyndaǵy jarııalanǵan aqparatqa qaraǵanda, tornadonyń sýreti Qashaǵan ken ornyndaǵy D aralynyń mańynda túsirilgen. «Qazir bul qubylysty Esenov atyndaǵy Aqtaý ýnıversıtetinen Gennadıı Vladımırovıch Tarasenko zerttep jatyr. Gennadıı Vladımırovıch jer órisi energııasynyń ózgerýin de zertteıdi. Jańa qubylystardyń sebebi de osy shyǵar», - delingen Telegram arnasynda.

Buryn bes elge – Qazaqstan, Ázerbaıjan, Túrkimenstan, Reseı men Iranǵa ortaq Kaspıı teńizinde tornadonyń tirkelgeni týraly málimet taraǵan joq. Sol sebepten bul atalǵan teńizdegi alǵashqy tornado bolýy múmkin.

Al «Qashaǵan» – Kaspıı teńiziniń qazaqstandyq bóliginde ornalasqan álemdegi iri munaı jáne gaz ken orny. Ol Atyraý qalasynan ońtústik-batysqa qaraı 80 shaqyrym jerde ornalasqan. Qashaǵan 75h45 shaqyrym aýmaqty alyp jatyr. Ken ornynyń kollektory Kaspııdiń soltústik bóliginde teńiz túbinen 4200 metrdeı tereńdikte jatyr.

Atalǵan ken ıgerip jatqan NCOC tornado týraly ázirge aqparat bergen joq.

Eske sala ketelik, budan buryn Kaspıı teńizinde jasandy araldar paıda bolýy múmkin ekenin habarlaǵan bolatynbyz.