Kaspıı teńizinde joǵalǵan eki áskerı qyzmetshiniń denesi tabyldy: izdestirý operatsııasy aıaqtaldy
ASTANA. KAZINFORM – Kaspıı teńizi akvatorııasynda júrgizilgen izdestirý-qutqarý operatsııasy aıaqtaldy. Bul týraly Qorǵanys mınıstrliginiń baspasóz qyzmeti habarlady.
Búgin, 25 qyrkúıekte, saǵat 9:15 shamasynda úzdiksiz júrgizilgen izdestirý-qutqarý jumystary barysynda buǵan deıin iz-túzsiz joǵalǵan eki áskerı qyzmetshiniń — serjant Mansur Gýmarov pen matros Mıras Turdybekulynyń deneleri tabyldy.
Eske salaıyq, qaıǵyly oqıǵa oqý-jaýyngerlik mindetti oryndaý barysynda aýa raıynyń kenetten kúrt nasharlaýynan oryn alyp, nátıjesinde 17 áskerı qyzmetshini ashyq teńizge alyp ketken bolatyn. Olardyń úsheýi qutqarylyp, 14 áskerı qyzmetshi qaza tapty.
— Qazaqstan Respýblıkasy Qorǵanys mınıstrliginiń jáne Qarýly kúshteriniń basshylyǵy men jeke quramy qaza tapqan áskerı qyzmetshilerdiń týǵan-týystary men jaqyndaryna qaıǵyryp kóńil aıtady.
Qaza bolǵan áskerı qyzmetshilerdiń otbasylaryna qajetti jan-jaqty, onyń ishinde materıaldyq jáne psıhologııalyq kómek kórsetiledi, — delingen mınıstrlik habarlamasynda.
Eske salaıyq, 2026 jylǵy 24 qyrkúıekte Kaspııdegi áskerı oqý-jattyǵý kezinde 9 áskerı qyzmetshi qaza tapqanyn habarlaǵanbyz. Úsh áskerı qyzmetshi qutqaryldy. Olardyń bireýi aýrýhanaǵa jatqyzyldy.
Keıinnen Kaspııde qaza bolǵan áskerı qyzmetshilerdiń sany 12-ge jetip, ekeýi izdestirilip jatqany habarlandy.
Qorǵanys mınıstrligi oqý-jattyǵý kezinde qaza tapqan áskerı qyzmetshilerdiń tizimin jarııalady.
Áskerı qyzmetshilerdiń qaza bolý faktisi boıynsha qylmystyq is qozǵalyp, tergelip jatqanyn jazdyq.
Sonymen qatar, Prezıdent Qasym-Jomart Toqaev Mańǵystaý oblysynda áskerı oqý-jattyǵý kezindegi qaıǵyly oqıǵa saldarynan qaza tapqan áskerı qyzmetshilerdiń týǵan-týystaryna kóńil aıtty.
Áskerılerdiń qazasynan keıin Aqtaýda úsh kúnge josparlanǵan merekelik sharalar ótpeıtini aıtyldy.
Búgin Kaspııde eki áskerı qyzmetshini izdeý operatsııasyna júzdegen adam jumyldyrylǵany habarlandy.
Sonymen qatar áskerı qyzmetshilerdiń qaýipsizdigine jaýapty tulǵalar kúdikke ilingeni týraly jazǵan edik.
Aıta ketelik Kaspııdegi tótenshe jaǵdaıdan keıin qutqarylǵan áskerı qyzmetshi esin jıǵan edi.
