Kaspıı teńizinde otyzǵa jýyq aqqýdyń óleksesi tabyldy

Mańǵystaý oblysyndaǵy Qarakól aýmaǵynan otyzǵa jýyq aqqýdyń óleksesi tabyldy. Qazir qustardyń qyrylýyna baılanysty saraptama jumysy bastaldy, dep habarlaıdy Kazinform.

Mańǵystaý oblystyq orman sharýashylyǵy jáne janýarlar dúnıesi aýmaqtyq ınspektsııasynyń málimetinshe, aqqýlardyń qyrylýy bir apta buryn anyqtalǵan.

«21-22 jeltoqsan kúnderi Mańǵystaý oblysynda erekshe qorǵalatyn tabıǵı aýmaqta «Qaraqııa-Qarakól» qaýmalynyń ınspektorlary qorǵaý, reıdtik is-sharalar júrgizý kezinde «Qarakól» kóli aýmaǵynan 30 aqqýdyń óleksesi tabyldy. 23-24 jeltoqsan kúnderi de kólden ólgen aqqý deneleri tabylǵan. Qustardyń qyrylýyna baılanysty tıisti veterınarlyq synamalardy alý úshin «Ústirt» qoryǵy tarapynan (qaýmaldyń qorǵaý jumysy «Ústirt» qoryǵyna júktelgen) oblystyq aýyl sharýashylyq basqarmasy, AShM veterınarlyq baqylaý jáne qadaǵalaý komıtetiniń MO aýmaqtyq ınspektsııasy habarlanyp, Aqtaý qalalyq veterınarlyq stantsııasynyń mamandary 22 jeltoqsan kúni aqqý ólekselerinen tıisti synamalar aldy», - dep jazylǵan ınspektsııa taratqan aqparatta.

Budan bólek, qustardyń qyrylýyna baılanysty Almaty qalasyndaǵy «Mıkrobıologııa jáne vırýsologııa» ǵylymı óndiristik ortalyǵy mamandary da ólgen aqqýlardan tıisti synymalar alǵany belgili boldy. Budan bólek, MO ekologııa departamentinde kól sýynan synama alý týraly hat joldandy.

Inspektsııa mamandary Qarakól kólinde aqqý ólekselerinen alynǵan synamalardyń qorytyndysy shyqqannan keıin qosymsha habarlama beretinin málimdedi.