Kaspıı teńizinde balyq aýlaǵan turǵynnyń ólimine qatysty is qozǵaldy

ATYRAÝ. KAZINFORM – Qyrkúıektiń basynda áleýmettik jelilerde Kaspıı teńiziniń sý aıdynynda, Atyraý oblysy Isataı aýdanyna qarasty Zıneden aýyly mańynda oryn alǵan oqıǵaǵa qatysty túrli málimetter taraǵan edi. 

Jeli qoldanýshylarynyń jazýynsha, balyq ınspektsııasy qyzmetkerleri qýǵyndaǵan qaıyqtaǵy er adamnyń jaǵdaıy kúrt nasharlap, esinen tanyp, keıinnen qaıtys bolǵany aıtylǵan.

Atalǵan jaıtqa baılanysty Kazinform agenttigi resmı organdarǵa suraý joldady. Oqıǵaǵa qatysty resmı málimetti Isataı aýdanynyń prokýratýrasy usyndy.

– 2025 jylǵy 9 qyrkúıekte Kaspıı teńizinde Isataı aýdany Zıneden aýyly mańynda balyq ınspektsııasy qyzmetkerleri qaıyqty tekserý barysynda onyń júrgizýshisi esinen tanyp, keıin qaıtys bolǵan. 10 qyrkúıek kúni Isataı aýdandyq polıtsııa bólimi atalǵan fakti boıynsha kisi ólimi deregimen sotqa deıingi tergeý amaldaryn bastady. Máıitke sot-medıtsınalyq saraptama taǵaıyndaldy. Ózge málimetter Qylmystyq-protsessýaldyq kodekstiń 201-babyna sáıkes jarııa etýge jatpaıdy, – delingen Isataı aýdany prokýratýrasynyń resmı habarlamasynda.

Buǵan deıin Atyraýda brakonerler Jaıyq ózeniniń Kaspıı teńizinen quıar saǵasynan zańsyz balyq aýlaǵan. Reıd kezinde olar mototsıklin tastap qashyp ketkenin jazǵanbyz.