Kaspıı teńizin zertteıtin ınstıtýttyń qashan qurylatyny belgisiz
ASTANA. KAZINFORM – Bıyl 25 qańtarda Úkimet «Kaspıı teńiziniń qazaq ǵylymı-zertteý ınstıtýty» kommertsııalyq emes aktsıonerlik qoǵamyn qurý týraly qaýlyny bekitti. Oǵan sáıkes QR Sý resýrstary jáne ırrıgatsııa mınıstrligi Sý sharýashylyǵy komıtetiniń «Qazsýshar» RMK balansyndaǵy respýblıkalyq múlik esebinen qamtamasyz etilýi tıis. Jyl aıaqtalýǵa jaqyn, osy oraıda ınstıtýttyń taǵdyry týraly quzyrly organdardan suraǵan edik.
Úkimet qaýlysynan keıin Sý resýrstary jáne ırrıgatsııa mınıstrligi málimdeme jasady.
Aqparatta aıtylǵandaı, ǵylymı-zertteý ınstıtýty Kaspıı teńiziniń ekologııalyq, sý deńgeıiniń tómendeý problemasyn, ıtbalyqtar men balyqtardyń jappaı qyrylý sebepterin, Kaspıı ıtbalyqtarynyń popýlıatsııasyn saqtaý máselelerin, ıhtıofaýnany, Kaspıı sý aıdyny men jaǵalaýyn zertteıdi. Sondaı-aq, Kaspıı aýmaǵyndaǵy shekaralas memleketterdegi áriptesterimen ózara tyǵyz is-qımyldy qamtamasyz etedi.
Sondaı-aq, Sý resýrstary jáne ırrıgatsııa mınıstri Nurjan Nurjigitov bul Memleket basshysy júktegen tapsyrma ekenin jáne mundaı uıymdar Kaspıı mańyndaǵy elderde bar ekenin aıtty.
Degenmen atalǵan vedomstvonyń baspasóz qyzmeti Kaspıı teńizin ǵylymı-zertteý ınstıtýtyn qurý máselesi Ekologııa jáne tabıǵı resýrstar mınıstrliginiń quzyretinde ekenin jetkizdi.
«Qazirgi ýaqytta kommertsııalyq emes aktsıonerlik qoǵam múlkin Sý resýrstary jáne ırrıgatsııa mınıstrliginen Ekologııa jáne tabıǵı resýrstar mınıstrliginiń balansyna berý protsesi júrip jatyr. Kommertsııalyq emes aktsıonerlik qoǵamnyń jarǵylyq kapıtalyn qalyptastyrý boıynsha jumys áli aıaqtalǵan joq. Úkimet qaýlysy ázirlendi, ol múddeli memlekettik organdarmen kelisý rásiminen ótýde», - delingen Ekologııa jáne tabıǵı resýrstar mınıstrliginiń resmı saýalǵa jaýabynda.
Odan bólek, Ekologııa mınıstrliginen ǵylymı ınstıtýttyń jumys jospary, qarjylandyrý kózi, kadr jáne materıaldyq bazamen qamtý jaǵyn suraǵan edik.
«Sizdi qyzyqtyratyn suraqtarǵa tolyq aqparat berý múmkin emes», - dep qysqa qaıyrdy vedomstvodan.
Eske sala ketsek, qarashanyń basynda Kaspıı jaǵalaýynan 500-den astam ıtbalyqtyń óleksesi tabyldy.
Keıin jappaı qyrylǵan ıtbalyqtyń sany 1 myńǵa jýyqtady.
Odan bólek, Mańǵystaýda ıtbalyqtarmen qosa bekire tuqymdas balyqtar men sý qustary da qyrylyp jatqany belgili boldy.
14 qarashada Aýyl sharýashylyǵy mınıstrligi Kaspıı teńizinde qyrylǵan ıtbalyqtardy zertteýge qatysty aldyn ala málimetti jarııalady.