Kaspıı teńizin zerdeleýge Úkimet rezervinen 1,1 mlrd teńge baǵyttaldy

ASTANA. KAZINFORM — Prezıdenttiń Kaspııdi keshendi zerdeleý jáne saqtaý, sondaı-aq óńirdiń ekologııalyq turaqtylyǵyn qoldaý jónindegi tapsyrmalaryn oryndaý sheńberinde Úkimet rezervinen «Kaspıı teńizi Qazaq ǵylymı-zertteý ınstıtýty» AQ-ǵa 1,1 mlrd teńge bólindi. Bul týraly Úkimettiń baspasóz qyzmeti málim etti.

Tıisti Qaýlyǵa Premer-Mınıstr Oljas Bektenov qol qoıdy.

— Qarjylandyrý ınstıtýttyń ǵylymı áleýetin jaqsartýǵa yqpal etedi. Qarajat teńizde monıtorıng júrgizý úshin negizgi jabdyqtardy satyp alý jáne gıdrobıologııalyq jáne gıdrohımııalyq zerthanalardy jaraqtandyrý josparlanýda, bul teńizdiń qazaqstandyq sektorynda bolyp jatqan protsester týraly óziniń ǵylymı-negizdelgen bazasyn qalyptastyrýǵa múmkindik beredi, — delingen habarlamada.

Búgingi tańda ǴZI tıimdi sharalardy ázirleý úshin halyqaralyq ǵylymı qoǵamdastyqqa belsendi ıntegratsııalanýda, Kaspıı mańy elderiniń ýnıversıtetteri men ǵylymı-zertteý ortalyqtarynyń qaýymdastyǵyna kirdi. Osy qaýlyny júzege asyrý úshin Ekologııa jáne tabıǵı resýrstar mınıstrligine barlyq qajetti sharalardy qabyldaý, Qarjy mınıstrligine bıýdjet qarajatynyń maqsatty paıdalanylýyna qatań baqylaýdy qamtamasyz etý tapsyryldy.

Eske sala keteıik, Prezıdent Qasym-Jomart Toqaev Qazaqstan-Iran bıznes forýmynda Kaspıı teńizin jáne onyń ekojúıesin saqtap qalýǵa basa mán bergen edi. Memleket basshysy Kaspııdiń sýyn saqtaý úshin birlesip áreket etý keregin alǵa tartty.