Kaspıı teńizin, Balqash kólin saqtap qalý úshin naqty sharalar qabyldaý qajet — Toqaev

ASTANA. KAZINFORM — Memleket basshysy Qasym-Jomart Toqaev Aqordada sý sharýashylyǵy qyzmetkerlerin memlekettik nagradalarmen marapattaý rásiminde Kaspıı teńizin, Balqash kólin, basqa da sý kózderin saqtap qalý máselelerine toqtaldy. 

— Sý, ekonomıkaǵa, ekologııaǵa, halyqtyń densaýlyǵyna, jalpy barlyq salaǵa erekshe yqpal etedi. Sondyqtan sýdyń taza ári qoljetimdi bolýy óte mańyzdy. Elimizde Kishi Araldy qutqarý úshin jyldar boıy aýqymdy jumys satqarylyp keledi. Sonyń arqasynda qashqan teńiz qaıta oralyp, aıdyny sýǵa tolyp jatyr. Kaspıı teńizin, Balqash kólin, basqa da sý kózderin saqtap qalý úshin naqty sharalar qabyldaý qajet. Sý durys paıdalana bilseń qut, ysyrap etseń jut. Byltyr Qazaqstannyń birneshe aımaǵy qarǵyn sýdan qatty zardap shekti. Mundaı joıqyn tabıǵı apat elimizde buryn-sońdy bolmaǵan. Kúrdeli kezeńde sizder qaısarlyq pen kásibıliktiń ozyq úlgisin kórsettińizder. Ár qyzmetker kúni-túni eńbek etip, apat saldaryn joıýǵa belsene atsalysty. Mne barshańyzǵa shynaıy rızashylyǵymdy bildiremin, — dedi Prezıdent.

Qasym-Jomart Toqaev bıyl elimizde Jumysshy mamandyqtar jyly dep jarııalanǵanyn, memleket eńbek adamdaryn árdaıym qoldaıtynyn basa aıtty.

— Byltyr Qazaqstannyń sý sharýashylyǵy salasynyń eńbek sińirgen qaıratkeri qurmetti ataǵy bekitildi. Búgin osy ataq birqatar ardagerge beriledi. Eńbek adamynyń orny árdaıym tórde bolýǵa tıis. Ózderińiz sııaqty kásibine adal, eńbekqor azamattar joǵary marapatqa laıyq. Sondyqtan men Qazaqstannyń sý sharýashylyǵyn damytýǵa eleýli qosqan bir top azamatty memlekettik nagradamen marapattaý týraly Jarlyqqa qol qoıdym. Bul - halyqtyń sizderge degen qurmet-qoshemeti jáne shynaıy alǵysy, — dedi Memleket basshysy.

Aıta keteıik, búginde sý salasy qyzmetkerleriniń jalaqysyn arttyrý boıynsha turaqty negizde jumys júrgizilip keledi. Bul týraly Úkimettiń baspasóz qyzmeti málim etti.