Kaspıı teńizi ıtbalyqtarynyń rezervaty qurylady
ASTANA. KAZINFORM — Rezervat Kaspıı ıtbalyqtarynyń mekenin saqtaýǵa múmkindik beredi. Bul týraly Qazaqstan Respýblıkasy Prezıdentiniń keńesshisi — Prezıdenttiń halyqaralyq ekologııalyq yntymaqtastyq jónindegi arnaýly ókili Zúlfııa Súleımenova málim etti.
Búgin elordada Birikken Ulttar Uıymynyń azyq-túlik jáne aýyl sharýashylyǵy uıymy (FAO) men elimizdiń Sý resýrstary jáne ırrıgatsııa mınıstrliginiń uıytqy bolýymen sý resýrstaryn turaqty basqarý máselelerine arnalǵan dóńgelek ústel ótti.
— Kaspıı teńizi boıynsha jumys júrgizilýde, bul baǵytta Memleket basshysynyń birneshe bastamasy bar. Birinshi bastama — rezervat qurý, ony Kaspıı teńizi ıtbalyqtarynyń rezervaty dep ataımyz. Ol rezervat Kaspıı ıtbalyqtarynyń mekenin saqtaýǵa múmkindik beredi. Sonymen qatar Kaspıı teńizin zertteý ǵylymı ınstıtýt quryldy, odan bólek qazir biz qosymsha jobalar boıynsha jeke talqylap, konsýltatsııa júrgizip jatyrmyz. Atalǵan jobalar tolyq maquldanǵan kezde qosymsha aqparat beriledi, — dedi Zúlfııa Súleımenova dóńgelek ústel barysynda agenttik tilshisiniń saýalyna jaýap bere turyp.
Osylaısha, Prezıdenttiń arnaýly ókili Kaspıı teńizin saqtaýǵa qatysty qosymsha jobalardyń qolǵa alynǵanyn rastady.
Eske sala ketsek, 2023 jyly Kaspıı sýynyń tartylýy men ıtbalyqtyń qyrylý sebebin zertteıtin ınstıtýt ashylatyny týraly habarlaǵan edik.
Degenmen byltyr jyl sońynda Kaspıı teńizin zertteıtin ınstıtýttyń qashan qurylatyny belgisiz bolyp shyqty.
Sondaı-aq Balyq sharýashylyǵy komıteti ıtbalyqtardyń qurlyqqa shyǵyp ketýin túsindirdi.