Kaspıı teńizi ǵylymı-zertteý ınstıtýtyn odan ári damytýǵa Úkimet rezervinen qarajat bólindi
ASTANA. KAZINFORM – Memleket basshysynyń Kaspıı teńizi problemalaryn keshendi zertteý jónindegi tapsyrmalaryn júzege asyrý sheńberinde «Qazaq Kaspıı teńizi ǵylymı-zertteý ınstıtýty» KeAQ-qa Úkimet rezervinen 305 mln teńge bólindi. Premer-mınıstr Oljas Bektenov tıisti qaýlyǵa qol qoıdy.
Instıtýt Memleket basshysy Qasym-Jomart Toqaevtyń tapsyrmasymen Kaspıı teńiziniń ekologııalyq máselelerin zertteý maqsatynda quryldy. Atap aıtqanda, ǴZI-diń qyzmet aıasyna balyq qorynyń kólemin baǵalaý, olardy saqtaý ádisteri men tehnologııalaryn ázirleý, ıhtıofaýnany zertteý, ıtbalyqtardyń jappaı qyrylý sebepterin anyqtaý jáne olardyń popýlıatsııasyn saqtaý máseleleri kiredi. Sonymen qatar teńizdiń gıdrologııalyq úderisterin zertteýge jáne onyń deńgeıin baqylaýǵa, klımattyń ózgerýin jáne onyń ekojúıege áserin taldaýǵa, sýdyń sapasy, bıologııalyq alýantúrlilik jáne Kaspıı teńiziniń qazaqstandyq bóligi men jaǵalaýynyń ózge de parametrleri jónindegi derekterdi jınaý jáne taldaýmen aınalysady.
Úkimet rezervinen bólingen qarajat ınstıtýtty odan ári damytýǵa baǵyttalǵan, gıdrobıologııa jáne gıdrohımııa, gıdrometeorologııa, spýtnıktik monıtorıng zerthanalarynda ǵylymı-zertteý jumystaryn ýaqtyly ári tıimdi júrgizýge, sondaı-aq ınstıtýtqa júktelgen ózge de mindetterdi oryndaýǵa múmkindik beredi.
Anyqtama:
Kaspıı teńizi biregeı ekojúıe jáne sý bıoresýrstarynyń asa mańyzdy kózi, sondaı-aq batys óńirler men jalpy elimizdiń turaqty damýyna úlken úles qosady.
Kaspıı teńiziniń Qazaqstan tarapyndaǵy jaǵalaýynyń uzyndyǵy 2 320 shaqyrym, bul barlyq Kaspıımańy memleketteri arasyndaǵy eń uzyn jaǵalaý syzyǵy.