Kaspıı teńiziniń jaǵalaýyndaǵy qamys órtine tikushaqpen 162 tonna sý tógildi
Atyraý oblysy ákiminiń orynbasary Jasulan Bısembıevtiń aıtýynsha, ákimdik órtti sóndirýge óndiristik kásiporyndardyń tehnıkalary tartylǵan.
«Kaspıı teńiziniń jaǵalaýyndaǵy órtti sóndirýge qatysqan jumysshylardy tamaqtandyrý uıymdastyryldy. Qamys órtin sóndirýge tikushaqpen 54 ret sý tasyldy. Búgin, 9 shildede qamys órtine 162 tonna sý tógildi. Aerovızýaldy barlaý kezinde laýlap janyp jatqan órt oshaǵy anyqtalmady. Keıbir aýmaqta qamys byqsyp jatyr», -dep habarlady Jasulan Bısembıev.
Oblystyq Tótenshe jaǵdaılar departamentiniń qoǵammen baılanys tobynan málim etkendeı, búgin, 9 shildede teńiz jaǵalaýyndaǵy jalyn sharpyǵan aýmaq 690 gektarǵa jetken.
Kaspıı teńiziniń jaǵalaýynda 6 shildeden beri qamys órtenip jatyr.
Atyraý oblystyq tótenshe jaǵdaılar departamenti basshysynyń mindetin atqarýshy Asqat Erjanovtyń málimetinshe, Kaspıı teńiziniń jaǵalaýyndaǵy órttiń tutanǵany keshki saǵat 20:00 shamasynda belgili bolǵan.
«Qamys órti Atyraý qalasyndaǵy Keńózek aýyldyq okrýginen 30 shaqyrym qashyqtyqta tirkeldi. Sol kúni keshkisin órt aýmaǵyn baqylaý úshin 12 qyzmetker jiberildi», -dep málim etken edi Asqat Erjanov.
Keıin Kaspıı jaǵalaýyndaǵy qamys órti 450 gektarǵa jaıylǵanyn jazǵan bolatynbyz.
Sondaı-aq, qamys órtin sóndirýge Qyzylordadan tikushaq tartylatynyn habarlaǵan edik.
Al, keshe jaǵalaýdaǵy qamys órtine tikushaqpen 60 tonnaǵa jýyq sý tógildi.
