Kaspıı teńiziniń jaǵalaýynan ólgen balyqtar tabylǵan joq - basqarma

AQTAÝ. QazAqparat - Bul týraly qoǵamdyq kommýnıkatsııa ortalyǵynda ótken brıfıngte Mańǵystaý oblysy balyq sharýashylyǵy basqarmasynyń basshysy Arman Moldashev aıtyp berdi, dep habarlaıdy QazAqparat.

Spıkerdiń aıtýynsha, 29 tamyzda áleýmettik jelide jarııalanǵan Kaspıı teńiziniń jaǵalaýynda óli batpaqaı balyǵynyń jatqany týraly beınejazba boıynsha baqylaý júrgizilgen.

- Osy derek týraly jumys tobynyń barlyq múshelerine jedel túrde habarlandy. 2022 jylǵy 29-30 tamyz aıynda mán-jaıdy anyqtaý úshin jergilikti atqarýshy organnyń, Mańǵystaý oblysynyń mamandandyrylǵan tabıǵat qorǵaý prokýratýrasynyń, Mańǵystaý oblysy boıynsha balyq ınspektsııa basqarmasynyń, Mańǵystaý oblysy polıtsııa departamenti jergilikti polıtsııa qyzymeti basqarmasynyń tabıǵatty qorǵaý jónindegi jedel qyzymetiniń jáne Mańǵystaý oblysy ekologııa departamentiniń ókilderinen turatyn jumys toby «Qarajanbas», «Qalamqas» jáne «Qaraturym» ken oryndary aýmaǵynda Kaspıı teńiziniń jaǵalaýlaryna avtokólikpen tekseris jumystaryn júrgizdi. Alaıda, atokólikpen bara almaıtyn aımaqtary da boldy. Osyǵan oraı 31 tamyz kúni jumys toby jergilikti ýaqytpen 12.50 men 14.15 aralyǵynda «MI-8» tikushaǵymen áýe arqyly ushý kezinde Kaspıı teńiziniń «Qarajanbas» ken ornynan bastap «Komsomol zalıv» aýmaǵyna deıin baqylaý júrgizdi,-dedi Arman Moldashev.

Basqarma basshysy tikushaqpen qaraý kezinde de Kaspıı teńiziniń jaǵalaýynda ólgen balyqtar anyqtalmaǵanyn atap ótti.

Sondaı-aq, brıfıngke Jaıyq-Kaspıı oblysaralyq basseındik balyq sharýashylyǵy ınspektsııasy Mańǵystaý oblysy boıynsha balyq ınspektsııasy basqarmasynyń basshysy Jaqsyǵalı Іzdibaev qatysty.

Onyń aıtýynsha, Kaspıı teńizi jaǵajaılaryn monıtorıngileý jumystary áli de jalǵasyp jatyr.

Foto:instagram.com/mangystau.news