Kaspıı teńiziniń jaǵalaýyna qoqıqazdar ushyp keldi
«Aqjaıyq» memlekettik tabıǵı rezervatynyń ornıtology Ilıa Bofonovtyń aıtýynsha, qoqıqazdar Kaspıı teńiziniń jaǵalaýynda baıqalǵan.
«Bul qus jyl saıyn kúzde rezervat aýmaǵy arqyly ushady. Keıde óte kóp jınalady. Qyzǵylt qoqıqazdar Ońtústik Iran, Irak, Úndistan, Frantsııa men Afrıka elderine deıin ushady. Sol sebepten, bizdiń rezervattyń aýmaǵyna aıaldap, demalady ári qorektenedi. Bir ereksheligi, qoqıqazdar baǵytyn eshqashan ózgertpeıdi» - deıdi Ilıa Bofonov.
Onyń deregine súıensek, «Aqjaıyq» memlekettik tabıǵı rezervaty Úkimettiń 2009 jylǵy 6 aqpandaǵy qaýlysymen qurylǵan. 2009 jylǵy 1 sáýirde Jaıyq ózeniniń Kaspıı teńizine quıar saǵasyndaǵy rezervat aýmaǵy halyqaralyq mańyzy bar sýly-batpaqty alqaptar tizimine engizilgen.
Eske sala ketelik, budan buryn Jaıyq ózeniniń Kaspıı teńizine quıar saǵasynyń tereńdigi ólshengenin jazǵan bolatynbyz.