Kaspıı teńiziniń tartylýy múmkin be – Ekologııa mınıstri jaýap berdi

ASTANA. QazAqparat – QR Ekologııa jáne tabıǵı resýrstar mınıstri Zúlfııa Súleımenova Kaspıı teńizin saqtaý boıynsha kóńil kónshitpeıtin boljamdar jasady, dep habarlaıdy QazAqparat tilshisi.

«Qazir tátti úmit bergim kelmeıdi. Ókinishke oraı, Kaspıı teńiziniń ekojúıe retindegi qazirgi jaǵdaıy óte kúrdeli. Birqatar qysym faktorlary bar», - dedi mınıstr «Astana halyqaralyq forýmynyń» kýlýarynda.

Birinshiden, mınıstr Jaıyq pen Edildi qosa alǵanda, ózender aǵysy tómendegenin atap ótti. Óıtkeni Kaspıı teńizi jabyq sý aıdyny jáne ózenderden turaqty sý bolmasa, tartylyp qalýy múmkin.

«Ár sý aıdynyn qorektendirip turý kerek. Qazir Kaspııge quıatyn ózenderdiń jaı-kúıin kórip otyrmyz jáne kez kelgen azaıý, ózgeris, retteýler tikeleı áser etedi. Ekinshi másele – klımattyń ózgerýi. Bul ózenderdiń gıdrologııalyq rejımderine áser etedi. Sońǵy birneshe jylda biz sýdyń tartyla túskenin baıqaýdamyz. Kaspıı teńiziniń qazaqstandyq bóligi eń taıaz bolyp sanalady, sondyqtan biz syrtqy ekzogendik faktor retinde klımatty ózgerýi men retteý qyzmetiniń saldaryn birinshi bolyp kórip otyrmyz. Sondyqtan, ókinishke oraı, problema bar», - dep moıyndady Ekologııa mınıstri.

Zúlfııa Súleımenova bul másele Kaspıı mańy elderindegi áriptesteri arasynda kóterilip jatqanyn aıtty. Biraq másele týraly tek qana aıtý jetkiliksiz, tıimdi sharalar da qabyldanýy kerek.

«Bul máselelerdi sheshpeı, barlyq Kaspıı mańy memleketteriniń pármendi sharalarynsyz saqtaý týraly aıtý óte qıyn bolady», - dep qorytyndylady ol.