Kaspıı teńiziniń memlekettik mártebesine nazar aýdaratyn ýaqyt jetti - G. Seıitmaǵanbetova
ASTANA. 11 maýsym. QazAqparat - Kaspıı teńiziniń memlekettik mártebesine nazar aýdarý kerek. Búgin Májiliste elimizdiń ekologııalyq máselelerine arnalǵan Úkimet saǵatynda depýtat Gúlnár Seıitmaǵanbetova osylaı málim etti.
«Biz Kaspıı teńiziniń, elimizdiń shóleıt aımaǵynda ornalasqan ári baılyqqa toly jabyq basseın ekenin eshýaqytta esten shyǵarmaýymyz kerek. Sondyqtan da Kaspıı teńiziniń ekologııalyq jaǵdaıyna zor mán berýimiz, oǵan memlekettik mártebe berýimiz kerek. Onyń ústine biz aldaǵy 4-5 jylda osy aımaqta alyp kenishtiń munaılaryn óndire bastaımyz. Sol tusta oryn alýy múmkin tehnogendik sıpattaǵy jaǵdaılarǵa ázirmiz be? Al ondaı ázirlikti biz osydan 10-15 jyl buryn bastaýymyz kerek edi. Alaıda, bunyń ózin áli kúnge qolǵa alǵan emespiz», - deıdi depýtat.
Onyń aıtýynsha, búginge deıin elimizde Kaspıı teńiziniń qorshaǵan ortasy máselesin retteıtin normatıvtik-quqyqtyq qujattar áli de qamtylmaǵan. «Teńizde zor aýqymdy jobalardy, operatsııalardy bastaǵaly otyrmyz. Alaıda, solaı bola tura áli kúnge deıin ekologııalyq standarttardy qamtıtyn sharalar jasalmady», - deıdi Gúlnár Seıitmaǵanbetova.
