Kaspıı teńiziniń quqyqtyq mártebesi týraly Konventsııaǵa 2016 jyly qol qoıylýy múmkin - E. Ydyrysov

«Kaspıı teńiziniń quqyqtyq mártebesine qatysty kelissózder úderisi óte kúrdeli, 22 jyl boıy jalǵasyp keledi. Degenmen, teńizdiń quqyqtyq mártebesine qatysty qujatqa qol qoıatyn kezeńge jaqyndaı tústik. Naqtyraq aıtsaq, Konventsııanyń 60 paıyzǵa jýyǵy pysyqtalǵan, degenmen, kúrdeli, sheshimin tappaǵan máseleler de barshylyq. Bul máseleler qubyrlar tóseý, kemelerdiń erkin júzýi, Kaspıı bıoresýrstaryn qorǵaý, qorshaǵan ortany qorǵaýǵa qatysty máseleler. Kaspıı teńizi jaǵalaýyndaǵy áskerı qyzmetter boıynsha suraqtar da kúrdeli», - dedi E. Ydyrysov.

Mınıstrdiń aıtýynsha, Qazaqstan úshin, ásirese Kaspıı teńizinde qubyrlar salý máselesi ózekti bolyp tabylady. Osy turǵydan Qazaqstan men Ázerbaıjan jáne Túrkimenstan ortaq pozıtsııa ustansa, Reseı men Irannyń ustanymy bólek. Mınıstr bul óte názik sheshimdi talap etetin asa kúrdeli másele ekenin alǵa tartady. «Iran men Reseı teńizde qubyrlar salýdy Kaspıı jaǵalaýyndaǵy bes memlekettiń barlyǵynyń kelisimimen júrgizilsin dep otyr. Qazaqstan men Ázerbaıjan buǵan qarsy. Eger Qazaqstan men Ázerbaıjan teńiz tabanynan qubyr salǵysy kelse, onda biz Reseı men Iranǵa baryp, olardyń da ruqsatyn alýǵa tıis ekenbiz. Mine, biz buǵan qarsy bolyp otyrmyz. Óıtkeni, bul Ázerbaıjan men Qazaqstanǵa qatysty ǵana másele bolǵandyqtan, ony ózara sheshkimiz keledi», - dedi mınıstr E. Ydyrysov.

«Sońǵy ret Astrahan sammıti asa mańyzdy boldy, onda memleket basshylary Konventsııaǵa engiziletin asa mańyzdy qujattarǵa qol qoıyldy. Al Kaspıı boıynsha kelesi sammıt 2016 jyly Astanada ótpek, osy sammıtte memleket basshylary konventsııaǵa qol qoıý tapsyrmalaryn jumys tobyna júktegen bolatyn. Bul asa úlken ári kúrdeli sharýa, óıtkeni teńiz jaǵalaýyndaǵy memleketter ortaq kelisimge kelmegen, sonyń ishinde keıbir aımaqtar boıynsha ortaq pikir aıqyndalmaǵan máseleler áli de kún tártibinde bar», - dedi E. Ydyrysov.