Kaspıı teńiziniń qazaqstandyq bóligine munaı qaldyqtary tógilgen
AQTAÝ. QazAqparat - Kaspıı teńiziniń qazaqstandyq bóliginen munaı qaldyqtary anyqtaldy. Mańǵystaýdaǵy Baýtıno aýylynyń jaǵalaýynda 2 sharshy metr aýmaq lastanǵan, dep xabarlaıdy QazAqparat tilshisi.
Oblystyq ekologııa departamentiniń mamandary ol jerdi qorshaýǵa alyp, munaıdyń odan ári jaıylýyna bóget jasady. Jaǵalaýda júrgen turǵyndar bul jaǵdaıdy túsirip alyp, áleýmettik jelige júktegen. Qazir ekologııa departamentiniń mamandary aýmaqtyń kimge tıesili ekenin jáne qandaı ekologııalyq zardaby bar ekenin tekserýdi bastap ketti.
«Jaǵadaǵy batyp ketken kemeni kóterý kezinde az ǵana munaı ónimderi teńizge tógilgeni týraly habarlama tústi. Sondyqtan, ekologııalyq baqylaý memlekettik ınspektorlary men laboratorııa mamandary birlesip, atalǵan oqıǵa ornyna baryp qaıtty. Tıisti synamalar alyndy. Kináli tulǵalardy anyqtap jatyrmyz. Soǵan sáıkes jospardan tys tekseris júrgizý kózdelip otyr», - deıdi Mańǵystaý oblystyq ekologııa departamenti basshysynyń orynbasary Rýslan Tókenov.
