Kaspıı teńiziniń búgingi ekologııalyq ahýaly men bolashaq taǵdyry atyraýlyqtardy alańdatady - U. Elýbaev
ASTANA. Sáýirdiń 21-i. QazAqparat /Qanat Mámetqazyuly/ - Búgin QR Parlamenti Májilisiniń jalpy otyrysynda Úkimet basshysynyń atyna saýal joldaǵan depýtat Uzaqqalı Elýbev Kaspıı teńiziniń bolashaq taǵdyryna alańdaýshylyq bildirdi,
dep habarlaıdy QazAqparat.
Depýtattyń pikirinshe, elimizde kómirsýtektiń negizgi qorlary batys aımaqtarda, onyń ishinde Atyraý oblysynda ornalasqan. Bunda jalpy kólemi 1 mlrd. tonna munaıdy quraıtyn 75 ken orny bar. Bunyń ishinde qor kólemi 846 mln. tonnany quraıtyn 39 ken orny óńdelý ústinde bolsa, 7 ken ornynda daıyndyq jumystary júrgizilip jatyr, al 24 ken orny barlaýǵa deıingi jumystar satysynda eken.
«Deı turǵanmen, oblystyń aýa basseınin lastaýdyń negizgi úlesi (80-85 paıyz) munaı óndirý jáne munaı óńdeý kásiporyndarynyń úlesine tıedi. Sondyqtan da Kaspıı aımaǵynyń ekologııalyq jaǵdaıy atyraýlyqtardy qatty alańdatýda. Sonymen birge, elimizde 2020 jylǵa deıin kómirsýtegin óndirýdi 150 mıllıonǵa jetkizetin bolsaq, onyń jartysy Kaspıı teńizindegi Qashaǵan ken ornynan alynbaq. Bıylǵy jyly ADJIP-tiń Qarabatandaǵy munaı óńdeý kesheniniń qurylys-montaj jumysynyń aıaqtalýyna baılanysty, 9,5 myń adam jumystan qysqartylady, onyń 6,5 myńy atyraýlyqtar eken. Endeshe aldaǵy ýaqytta jumyssyz qalatyndardyń taǵdyry da úlken alańdaýshylyq týdyrady», dedi U. Elýbaev.
Osy rette depýtat óńirdegi kúrdeli bolyp tabylatyn birqatar máselelerdi alǵa tartty. «Kaspıı teńizi jaǵalaýynda ornalasqan eldi-mekenderdiń, Atyraý qalasynyń ekologııalyq jaǵdaıyn jaqsartýda qandaı sharalar qolǵa alynyp otyr? Soltústik Kaspıı kesheni Qashaǵan jobasynda 10 shaqyrymnan astam tereńdikten alynatyn munaıdyń kúkirttiligi 25 paıyz, qysym 940 atmosfera, bul degenińiz Teńiz kesheninen 35 ese kóp degen sóz. Eger apatty jaǵdaı týyndar bolsa, Kaspıı teńiziniń taǵdyry ne bolmaq?»,- dedi depýtat.
