Kaspıı teńiziniń Aqtaýdaǵy jaǵalaýynyń bir bóligi qara túske boıaldy

AQTAÝ.QazAqparat - Áleýmettik jelide Kaspıı teńiziniń Aqtaýdaǵy 4 shaǵynaýdandaǵy jaǵalaýynyń qara túske boıalǵany kórsetilgen beınejazba tarady. Mańǵystaý oblystyq ekologııa departamenti teńiz sýynyń ózgerýine qatysty túsinik berdi, dep habarlaıdy QazAqparat tilshisi.

Departament mamandary 4 a shaǵynaýdany teńiz jaǵalaýynyń qara túske enýine baılanysty tekserý jumystaryn júrgizgen.

«Atalǵan derek boıynsha departament mamandary teńiz jaǵalaýyna sholý jumystaryn júrgizdi. Sholý barysynda atalǵan aýmaqta tabıǵı qubylystar nátıjesinde jyldar boıy jınalǵan, óli baldyrlardyń shirýi men teńiz túbi laıynyń (ılovye osadkı) joǵary kóterilýi saldarynan teńiz túsi ózgeriske ushyraǵany anyqtaldy», - dep málim etti Mańǵystaý oblystyq ekologııa departamentiniń baspasóz qyzmetinen.

Mamandar qazir 4 a shaǵynaýdanyndaǵy teńiz jaǵalaýyn iri tehnıkanyń kómegimen tazalaý jumystaryn júrgizý úshin oblys ákimshiligine tazalyq jumystaryn uıymdastyrýdy surap, hat joldady.