Kaspıı teńizinen qutqarylǵan Túrkııa azamaty eline qaıtaryldy
Eske sala keteıik, Túrkııa azamaty 2020 jyldyń 31 jeltoqsanynda Jańaózen qalalyq kópbeıindi aýrýhanasyna aýyr jaǵdaıda túsken bolatyn. Jedel túrde hırýrgııalyq emdeý sharasy júrgizildi.
Túrik tarapynyń 2021 jylǵy 5 qańtardaǵy sheshimine sáıkes, naýqasty túrik sanavıatsııasy arqyly eline aýystyrý týraly sheshim qabyldandy.
Naýqas aldymen Aqtaý qalasyna Jańaózennen jetkizildi. Sóıtip Aqtaý halyqaralyq áýejaıy arqyly óz otanyna ushyp ketti. Ol Túrkııanyń soltústik-shyǵysyndaǵy Erzýrým qalasyna aman-esen jetti.
Aıta ketý kerek, 50 jastaǵy Túrkııa azamaty halyqaralyq kólik kompanııasynda júk kóliginiń júrgizýshisi bolyp jumys isteıdi.
Búgin Jańaózen qalalyq kópbeıindi aýrýhanasy ujymyna Túrkııa Respýblıkasynyń Aqtaý qalasyndaǵy Bas Konsýly Mýzaffer Akıyldyrymnyń atynan naýqasqa shuǵyl túrde medıtsınalyq kómek kórsetilgeni jáne sátti ota jasalǵany úshin Alǵys hat jiberildi.
Esterińizge sala keteıik, buǵan deıin «Sarbaz» shekara kemesiniń ekıpajy kúrdeli aýa raıy jaǵdaıynda «Akademık Hasan Alıev» paromynan Túrkııa azamatyn qutqarý operatsııasyn ótkizgeni habarlanǵan bolatyn.
Medıtsınalyq kómekke muqtaj er adam Kendirli shyǵanaǵy jaǵalaýyna shyǵarylyp, Jańaózen qalasyndaǵy aýrýhanaǵa jatqyzylǵan edi.
