Kaspıı teńizinen 300 keliden astam qoqys shyǵaryldy

AQTAÝ. QazAqparat - «Taza Kaspıı» aktsııasy aıasynda sý «ańshylary» teńiz astynan 300 keliden astam qoqys shyǵardy, dep habarlaıdy QazAqparat tilshisi.

Bul shara bıyl úshinshi ret uıymdastyryldy. Alǵashqy jyly ańshylar teńiz astynan 3 tonnadan artyq qoqys shyǵarǵan edi.

«Kaspıı - bizdiń basty baılyǵymyz. Biraq nemquraıly qaraıtyndar kóp. Demalǵan soń adamdar qoqysty ózderimen birge alyp ketýleri kerek. Biz tutynǵannan keıin qalatyn qaldyqtyń 80 paıyzyn qaıta óńdeýge bolady. Ol úshin qalanyń birneshe jerinde qabyldaý pýnktteri bar. Tipti sol úshin aqy da beredi. Sondyqtan karton qaǵazdar, plastıkterdi pýnktterge tapsyrý kerek», - dedi eko-belsendi Gúlaıym Qıbasova.

Sý «ańshylary» qala mańyndaǵy jaǵalaýlar taza ekenin aıtady. Al, qala syrtyndaǵy teńiz jaǵalaýlary tazalyqty qajet etedi. Kaspıı túbin tazalaý jumystary jergilikti eriktiler tarapynan da jıi uıymdastyrylyp turady.