Kaspıı teńizindegi qaýipsizdik salasynda bes memleket yntymaqtasatyn bolady - Májilis
ASTANA. QazAqparat - Búgin Májilistiń jalpy otyrysynda «Kaspıı teńizindegi qaýipsizdik salasyndaǵy yntymaqtastyq týraly kelisimdi ratıfıkatsııalaý týraly» zań jobasy maquldandy.
2010 jyldyń 18 qarashasynda Qazaqstan, Ázerbaıjan, Iran, Reseı jáne Túrkimenstan arasynda qol qoıylǵan kelisim aıasynda taraptar birqatar salalarda yntymaqtastyqty jandandyratyn bolady. «Atap aıtqanda, terrorızmge, uıymdasqan qylmysqa, kez kelgen qarý túrleri men oq-dáriniń, jarylǵysh jáne ýlandyrǵysh zattardyń, áskerı tehnıkanyń zańsyz aınalymyna qarsy kúres salasyndaǵy yntymaqtastyq qaralady. Budan bólek, esirtkiniń zańsyz aınalymyna, kontrabandaǵa, adam saýdasyna, bıologııalyq resýrstardy zańsyz aýlaýǵa qarsy kúres qamtamasyz etilip, teńizde júzý qaýipsizdigine mán beriledi. Taraptar osy kelisimdi iske asyrýǵa qatysty quzyretti organdardy taǵaıyndaıtyn bolady», - dedi QR Ulttyq qaýipsizdik komıteti tóraǵasynyń orynbasary Shekara qyzmetiniń dırektory Nurlan Jolamanov.
Toqtala ketetin jaıt, atalǵan kelisimdi búgingi tańda Iran men Qazaqstan tarapynan basqa memleketterdiń barlyǵy ratıfıkatsııalaǵan.
«Kaspıı teńiziniń quqyqtyq mártebesi aıqyndalmaǵan jaǵdaıda bes jaqty kelisim óńirdegi memleketterdiń aımaqtyq qaýipsizdiktiń qamtamasyz etilýin zańdy túrde bekitýge múmkindik beredi. Budan bólek, zańsyz áreketterge qarsy birlesken isqımyl jasaýǵa jol ashady», deıdi N. Jolamanov.
