Kaspıı teńizinde joǵalǵan balyqshylar áli tabylmady

NUR-SULTAN. QazAqparat - Mańǵystaý oblysynyń Tótenshe jaǵdaılar departamenti Kaspıı teńizinde balyq aýlaýǵa shyǵyp, qaıta oralmaǵan eki azamatty izdestirý jumystaryn jalǵastyryp jatyr, dep habarlaıdy QazAqparat vedomstvoǵa silteme jasap.

Departament málimetinshe, 30 sáýir kúni saǵat 1:00-de metall qaıyqpen Kaspıı teńizinde balyq aýlaýǵa shyǵyp, osy ýaqytqa deıin úıine oralmaǵan Qazaqstan Respýblıkasynyń azamatyn (1994 j.t.) jáne Ózbekstan Respýblıkasynyń azamatyn (1983 j.t.) izdestirý-qutqarý jumystary júrgizilip jatyr.

«Іzdestirý-qutqarý jumystaryna departamentten 2 tehnıka, 2 qaıyq jáne jeke quramnyń 9 qyzmetkeri, «Kazavıaspas» AQ MI-8 tik ushaǵy, QR Qorǵanys Mınıstrligi 29011 áskerı bóliminiń «Oral» kemesi jáne eriktiler jumyldyryldy»

, - dep habarlaıdy vedomstvo.

Budan buryn Kaspıı teńizinde joǵalǵan balyqshylar tikushaqpen izdestirilip jatqany habarlanǵan.

2 mamyrǵa jasalǵan boljam boıynsha, Mańǵystaý oblysynyń ońtústiginde, ortalyǵynda naızaǵaı túsýi múmkin. Óńirdiń batysy men shyǵysynda ekpini 15-20 m/s jel soǵyp, shańdy daýyl turýy yqtımal. Teńizde joǵary tolqyndyq qubylystar bolady.

Osy oraıda, oblystyq tótenshe jaǵdaılar departamenti «daýyldy eskertpeler túsken kezde teńizge júzý quraldarymen (qaıyqtyń ár túrimen) shyǵýǵa jáne shomylýǵa tyıym salynatynyn» eskertedi.