Kaspıı teńizinde zańsyz balyq aýlaǵan 109 brakoner ustaldy

NUR-SULTAN. QazAqparat – Qazaqstan jáne Reseı mamandary birlesip Kaspıı teńizinde brokonerlikpen aınalysqan 109 adamdy ustady, dep habarlaıdy QazAqparat tilshisi QR Ulttyq qaýipsizdik komıtetiniń baspasóz qyzmetine silteme jasap.

UQK-niń habarlaýynsha, elimizdiń shekara qyzmeti Kaspıı teńiziniń bıologııalyq baılyǵyn qorǵaýǵa baǵyttalǵan sharalar jalǵasyp jatyr.

«2022 jylǵy 30 sáýirde QR memlekettik organdary ıaǵnı ishki ister mınıstrligi jáne ekologııa, geologııa jáne tabıǵı resýrstar mınıstrligi Reseı Federatsııasynyń FQQ shekara qyzmeti birlesip brakonerlik qylmystardyń jolyn kesýge baǵyttalǵan jedel-profılaktıkalyq sharasyn ótkizdi. Reıdtik is-sharalar barysynda shekaralyq keńistikte 109 brokoner ustalyp, olardan 52 birlik júzý quraly tárkilendi», - delingen habarlamada.

Sondaı-aq, resmı aqparatta zań buzýshylarǵa 2,6 mln teńge kóleminde ákimshilik aıyppul salynǵany aıtylǵan.

«Sonymen qatar jalpy uzyndyǵy 300 shaqyrymnan astam brakonerlik aýlaý quraldary tárkilendi. 575 bekire balyǵy jáne usaq tuqymdas 4 803 balyq, sondaı-aq 43 ıtbalyq tabıǵı mekenine qaıtaryldy», - deıdi atalǵan vedomstvodan.

Osylaısha eki eldiń shekara qyzmeti birlesken is-qımyl nátıjesinde 1 mlrd teńgeden astam somadaǵy zalaldyń aldyn aldy.