Kaspıı teńizinde reseılik zań buzýshylar qýǵynshylardan qashyp ketý kezinde QR shekarashylarynyń katerine soqtyǵysty
ASTANA. Qazannyń 14-i. QazAqparat - Kaspıı teńizinde reseılik zań buzýshylar qýǵynshylardan qashyp ketý kezinde QR shekarashylarynyń katerine soqtyǵysty. Nátıjesinde, zań buzýshylardyń qaıyǵy aýdarylyp, olardyń bireýi oqıǵa ornynda qaza tapty, dep habarlady beısenbi kúni QR UQK baspasóz qyzmeti.
Baspasóz qyzmetiniń habarlaýynsha, «Búgin 01.05 saǵatta áskerı kezekshilikte júrgen «Naıza» shekara kateri radıolokatsııalyq baqylaý nátıjesinde Kaspıı teńiziniń qazaqstandyq jaq betindegi Ýrdıýk buǵazy mańynda aıyrý belgileri joq shaǵyn kemeni baıqady».
Shekarashylar baıda (júrdek qaıyq) anyqtalǵan aýdanǵa jaqyndap, júzý quralyna toqtaý týraly eskertý jasady. Biraq, zań buzýshylar shekarashylardyń sózine qulaq aspaı, kerisinshe óz qaıyqtarymen shekarashylar katerine soqtyǵysty, delingen aqparatta. Nátıjesinde zań buzýshylardyń katerine eleýli zaqym kelip, aýdarylyp qaldy. Shekaralyq katerdiń tek tumsyq bóligi ǵana azdap búlindi.
Shekarashylar azdaǵan dene jaraqattaryn alǵan eki quqyq buzýshyny ustady. Úshinshi quqyq buzýshy apat kezinde qaza tapqan eken. Ustalǵandardyń barlyǵy da Reseı Federatsııasynyń azamattary, dep naqtylaıdy baspasóz qyzmetindegiler.
Qazirgi ýaqytta quqyq qorǵaý organdary osy iske qatysty tergeý amaldaryn júrgizýde.
