Kaspıı teńizinde Qazaqstan men Reseı áskerleriniń oqý-jattyǵýy bastaldy

AQTAÝ. QazAqparat - Kaspıı teńizinde Qazaqstan men Reseı áskerleriniń birikken teńiz oqý-jattyǵýy ótip jatyr, dep habarlaıdy QazAqparat.

Qazaqstan Respýblıkasy Áskerı-teńiz kúshteriniń «Oral», «Saryarqa», «Mańǵystaý» jáne «Qazaqstan» raketalyq-artıllerııalyq kemeleri Reseı Federafııasy Áskerı-teńiz kúshteriniń Kaspıı flotılııasymen birlesken oqý-jattyǵýyna qatysýda.

Kaspıı teńiziniń qazaqstandyq akvatorııasynda ótip jatqan oqý-jattyǵý 22 qyrkúıekke deıin sozylady. Jýyrda Aqtaý qalasynyń portyna reseılik «Tatarstan» kemesi men «Stýpınets» kateri, sonymen qosa 2 gıdrografıkalyq keme, raketalyq jáne reıdtik traldar, qutqarý býksıri men kishi tanker kelgen bolatyn.

Oqý jattyǵý Áskerı-teńiz kúshteriniń bas qolbasshysy, kontr-admıral Sáken Bekjanovtyń jeke basshylyǵymen ótýde.

Jattyǵý barysynda Qazaqstan men Reseı Áskerı-teńiz kúshteri birikken toptarynyń jańa urys formalary men ádisterin zerdeleýge basty nazar aýdarylmaq. Eki eldiń teńizshileri arnaıy operatsııalar men urysty júrgizý boıynsha birqatar máselelerdi pysyqtap, kemelerdiń birlesken is-qımylyn, tapsyrmany oryndaý ornyndaǵy manevrlerdi júzege asyrady.

Osy jattyǵýdyń nátıjesinde eki eldiń birikken shtabtarynyń úılesimdiligi baǵalanyp, ofıtserlerdiń biliktilik deńgeıi synalady.

Búgingi kúni birikken oqý-jattyǵýdy ótkizýden basqa, qazaqstandyq jáne reseılik áskerı teńizshiler Halyqaralyq armııa oıyndary barysynda ózara is-qımyldardy birlese ótkizip, mashyǵyn jetildirýde.