Kaspıı teńizinde bekire tuqymdas balyqtardy zańsyz aýlaǵan Daǵystan Respýblıkasynyń 6 azamaty ustaldy
ASTANA. 3 qarasha. QazAqparat /Gúlmıra Álıakparova/ - Kaspıı teńiziniń soltústiginde 100 keliden astam bekire tuqymdas balyqty zańsyz aýlaǵan Daǵystan Respýblıkasynyń 6 azamaty ustaldy. Bul týraly búgin QR Іshki ister mınıstrliginde ótken baspasóz máslıhatynda málim boldy.
Habarlanǵandaı, brakonerler ótken aıdyń 23-31 kúnderi aralyǵynda Іshki ister mınıstrliginiń múddeli organdarmen birlesip ótkizgen «Brakoner» jedel-aldyn alý is-sharasy barysynda ustaldy. Sharanyń maqsaty - el aýmaǵynda zańsyz ań aýlaý, aǵash kesý, bıologııalyq resýrstar ónimderi men nysandarynyń zańsyz aınalymy faktilerin anyqtaý.
Tórt «Baıda» júzgish quralyna mingen daǵystandyqtardan bekire balyqtarynan bólek, «Garmın GPS» navıgatsııalyq quraly men tórt aý alyndy. Fakti boıynsha QR Qylmystyq kodeksiniń 287-shi baby, 3 bóligi boıynsha (sý janýarlary men ósimdikterdi zańsyz aýlaý) qylmystyq is qozǵaldy.
Jalpy 10 kúndik jumys barysynda tabıǵatty qorǵaý zańnamasyna, sondaı-aq ańshylyq atys qarýyn saqtaý jáne ony alyp júrý erejesine qatysty 3 myńnan astam buzýshylyq anyqtaldy. 2652 adam ákimshilik jaýapkershilikke tartyldy. Olardan óndirip alynǵan aıyppul kólemi - 3,7 mln. astam teńge. 377 ákimshilik hattamalar toltyrylyp, olar sotqa joldandy.
Sonymen birge, ekologııalyq qylmystarǵa qatysty - 29, bıologııalyq resýrstar nysandaryn zańsyz ıemdený, satý jáne urlaý faktileri boıynsha - 10, qarý-jaraqtardy zańsyz satyp alý jáne saqtaý boıynsha - 2 qylmystyq is qozǵaldy. Taǵy 22 materıal boıynsha is qozǵaý máselesi sheshilýde.
Anyqtalǵan faktiler boıynsha memleket bıýdjetine keltirilgen shyǵynnyń jalpy somasy - 5,5 mln. teńge.
