Kaspıı teńizinde balyq aýlaıtyn kemeler sanyn kóbeıtý kerek - mınıstr

ASTANA. QazAqparat – Búgin Parlament Májilisindegi Úkimet saǵatynda QR Ekologııa, geologııa jáne tabıǵı resýrstar mınıstri Serikqalı Brekeshev Kaspıı teńizinde balyq aýlaıtyn kemeler sanyn kóbeıtý kerek ekenin aıtty, dep habarlaıdy QazAqparat tilshisi.

«Balyq aýlaý flotynyń kemeleriniń tarıfteri munaı tankerleri men qurǵaq júk sý kóligine qoıylatyn talaptarmen birdeı (portqa bir kirý tólemi shamamen 500 myń teńge). Eger maıshabaq ónimderiniń ózindik qunynyń tómen baǵasyn eskersek, bul tarıf olar úshin qymbatqa túsedi. Sondyqtan Kaspıı teńizindegi balyq túrlerin aýlaýdy ıgerý úshin zańnamalyq deńgeıde teńiz flotyna jeńildikpen nesıe bólý nemese kemeni lızıng jolymen satyp alý máselesin sheshý qajet. Sondaı-aq port qyzmetterine tarıfterdi tómendetý máselesin pysyqtaý kerek», - dedi S. Brekeshev.

Sonymen qatar ol saladaǵy ınspektsııalardy quraldarmen jáne jabdyqtarmen tolyǵymen jaraqtandyrý úshin aldaǵy 3 jylǵa qosymsha 8 mlrd teńge qajet ekenin aıtty

«Bul óz kezeginde brakonerlermen kúrestiń tıimdiligin arttyrýǵa múmkindik beredi», - dedi mınıstr.

Budan buryn habarlanǵandaı, Qazaqstan 25 myń tonna balyq ónimderin eksporttaıdy.

Balyqty zańsyz aýlaǵandar 15 táýlikke qamalýy múmkin.