Kaspıı teńizinde balyq aýlaýǵa tyıym salý máselesi qaralyp jatyr - AShM

ASTANA. QazAqparat - QR Aýyl sharýashylyǵy mınıstrligi orman sharýashylyǵy jáne janýarlar álemi komıtetiniń basqarma basshysy Narıman Júnisovtyń aıtýynsha, búginde akvatorıde balyq tapshylyǵy barynsha baıqalady. Sol sebepti teńizde balyqty aýlaý kásibine ýaqytsha tyıym salý máselesi kóterildi, dep xabarlaıdy QazAqparat tilshisi.

«Bul bastamany Atyraý oblysynyń ákimdigi de qoldap otyr. Balyq sharýashylyǵy ǵalymdary da osy máseleni talqylap shyqty. Birinshi talqylaýǵa Mańǵystaý ákimdigi men balyqshylar qatysty. Qarsylyq joq sııaqty. Degenmen, ol másele áli de talqyǵa salynatyn bolady. Sebebi búginde osy aımaqta balyq sharýashylyǵymen aınalysatyndar az emes», - dedi Júnisov búgin Astanada ótken baspasóz máslıxatynda.

Onyń aıtýynsha, búginde balyq aýlaýǵa tyıym, ıa bolmasa oǵan ýaqytsha shekteý salý úshin bıologııalyq negizdeme kerek. Jaqynda ótken alǵashqy otyrysta atalǵan negizdemeni ázirleý týraly sheshim shyǵaryldy.

«Sol kezde Kaspıı teńizinde balyq aýlaýǵa tolyǵymen tyıym salynady, ıa bolmasa, shekteý engiziledi. Sondyqtan qazir naqty keńesterdi kúte turaıyq», - de atap kórsetti basqarma basshysy.