Kaspıı teńizinde apatty jaǵdaılar kóbinese sheteldik kemelerde oryn alady
ASTANA. QazAqparat - QR IDM Kólik komıtetiniń deregi boıynsha 2016 jyldyń 10 aıynda Kólik komıtetiniń aýmaqtyq organdary kemelerde 10 978 tekseris júrgizip, nátıjesinde 1 121 ákimshilik quqyq buzýshylyqty anyqtady, dep habarlaıdy QazAqparat.
«Qazirgi ýaqytta Kólik komıteti Qazaqstannyń teńiz porttaryndaǵy otandyq jáne sheteldik kemelerdi baqylaýdyń tıimdiligin arttyrýǵa múmkindik beretin kemelerdi tekserý nátıjesin tirkeýdi avtomattandyrý máselesin qolǵa aldy. Flottaǵy apatty eskertý maqsatynda Komıtet tıisti is-shara josparyn jetildirip, júzege asyrýda. Jyl basynan sý kóliginde 15 oqıǵa oryn alyp, onda 2 adam mert boldy jáne 3 adam zardap shekti. Teńiz kóligindegi apatty jaǵdaılar kemelerde qaýipsizdik talaptarynyń saqtalmaýynan oryn alǵan. Oqıǵalardyń basym bóligi, ıaǵnı, 9 jaǵdaı teńiz kemelerinde, ózen kemeleri boıynsha 2 fakt jáne 4 oqıǵa shaǵyn kemelerde bolǵan»,-dep atap ótilgen QR IDM baspasóz qyzmetiniń málimetinde.
Atalmysh toǵyz oqıǵanyń altaýy Kaspıı teńiziniń qazaqstandyq bóliginde sheteldik kemelerde bolǵan jaǵdaı. Adam ólimine ákep soqqan jáne adamdardyń densaýlyǵyna zııan keltirgen barlyq oqıǵalar kemeni paıdalanǵan kezde tehnıkalyq qaýipsizdikti saqtamaǵandyqtyń saldarynan bolǵan, osy rette qutqarý jıletiniń bolmaýy, sý kóligin basqarýda tájirıbeniń joqtyǵy áser etti.
Aıta keteıik, búginde Qazaqstanda 323 teńiz, 783 ózen jáne 28,7 myńnan astam shaǵyn kemeler tirkelgen. Keme júzetin sý joldarynyń qashyqtyǵy 4 myń shaqyrymnan asady.
