Kaspıı teńizinde 2 kólik sý ortasynda qaldy
Oblystyq tótenshe jaǵdaılar departamenti qoǵammen baılanys tobynyń málimetinshe, oqıǵa keshe, 3 qazanda bolǵan.
Isataı aýdanynda qatty soqqan jeldiń ekpinimen Kaspıı teńizinen tolqyn kóterilgen. Sonyń saldarynan Janbaı aýyldyq okrýgine qarasty Manash eldi mekeniniń tusynda 2 kólik teńiz sýynyń ortasynda qalǵan.
«Tótenshe jaǵdaılar departamentiniń dıspetcherlik pýltine Isataı aýdanyndaǵy Aqqystaý aýylynan shamamen 55 shaqyrym qashyqtyqta Janbaı aýylynan shaqyrtý tústi. Manash eldi mekeni tusyndaǵy Kaspıı teńiziniń jaǵalaýynda eki adam mingen kóliktiń batyp qalǵan. Kóliktegi adamdar ózdiginen shyǵa almaǵan», -dep habarlady.
Isataı aýdandyq №6 órt sóndirý bóliminiń, Janbaı shekaralyq beketi men aýdandyq polıtsııa bóliminiń qyzmetkerleri birlesip izdestirý-qutqarý jumysyn júrgizdi.
«Teńiz jaǵalaýynda batqan «Nıva» avtokóliginen 1967 jáne 1943 jylǵy eki er adam qaýipsiz jerge shyǵaryldy. Olar Isataı aýdanynyń ortalyǵy – Aqqystaý aýylyna jetkizildi. Jaǵdaılary qanaǵattanarlyq, medıtsınalyq kómekti qajet etpedi», -dep málim etti departamenttiń qoǵammen baılanys tobynan.
Qutqarý jumystaryna Isataı aýdandyq №6 órt sóndirý bóliminen 3 qyzmetker, 1 TREKOL kóligi, aýdandyq polıtsııa bóliminiń 2 qyzmetkeri men 1 tehnıkasy, Janbaı shekara beketinen 2 qyzmetker, 1 tehnıka tartyldy.
Eske sala ketelik, budan buryn Atyraýda bir kúnde 3,4 mln teńge aıyppuly tólenbegen 12 júrgizýshi ustalǵanyn habarlaǵan edik.
Vıdeodan alynǵan kadr