Kaspıı teńizin ıgerýdiń 30 jyldyǵy: 60 mlrd dollardan astam ınvestıtsııa tartyldy

ASTANA. QazAqparat - QR Premer-Mınıstri Álıhan Smaıylov respýblıkanyń munaı-gaz salasy ardagerleriniń qatysýymen Kaspıı teńiziniń qazaqstandyq bóligin ıgerýdiń 30 jyldyǵyna arnalǵan saltanatty is-sharada sóz sóıledi, dep habarlaıdy QazAqparat.

1993 jyldan beri Soltústik Kaspııde aýqymdy zertteý jumystary júrgizilip, nátıjesinde ondaǵan keleshegi bar qurylymdardy anyqtaýǵa múmkindik berdi.

«Barlaý jumystarynyń basty nátıjesi Qashaǵan ken ornynyń kommertsııalyq ashylýy týraly búkil álemge jarııalaý boldy. Bul ken ornynyń ereksheligi – munda orasan zor munaı men gaz qory bolǵanymen, ony ıgerý jumystarynyń kúrdeliligi», — dedi Álıhan Smaıylov.
Álıhan Smaıylov búgingi tańda osy qajyrly eńbektiń nátıjeleri kórinip otyrǵanyn atap ótti.

Búginde shamamen 90 mln tonna munaı, 55 mlrd tekshe metr gaz óndirildi;
$60 mlrd-tan astam ınvestıtsııa tartyldy, jergilikti qamtýdy damytýǵa $17 mlrd-tan astam ınvestıtsııa salyndy;
10 myńǵa jýyq adam, al qurylys kezeńinde 40 myńnan astam adam jumyspen qamtyldy.
Sonymen qatar Soltústik Kaspıı jobasynyń operatory – North Caspian Operating Company konsortsıýmy aldynda óndiristi odan ári ulǵaıtý boıynsha mańyzdy mindetter turǵany atap ótildi.
«Ken ornynda gaz óńdeý qýatyn damytý da óte mańyzdy másele. Osy másele boıynsha Memleket basshysy Úkimetke tıisti tapsyrma bergeni belgili. Biz ony belgilengen merzimde ári tolyq kólemde oryndaýymyz kerek. NCOC ujymynyń alǵa qoıǵan maqsattaryna jetýi úshin zor áleýeti bar ekenine senimdimin», — dedi Álıhan Smaıylov.
Memleket basshysy Qasym-Jomart Toqaevtyń Jarlyǵyna sáıkes QR Premer-Mınıstri Soltústik Kaspıı jobasynyń ardagerlerin Qazaqstannyń áleýmettik-ekonomıkalyq damýyna qosqan úlesi úshin memlekettik nagradalarmen marapattady. NCOC basshylary men jaýapty qyzmetkerleri, joba ardagerleri ІІ dárejeli «Parasat», «Qurmet», «Dostyq», ІІІ dárejeli «Eńbek dańqy» ordenderimen jáne «Eren eńbegi úshin» medalimen marapattaldy.