Kaspıı teńizi men Qarakól kóline sarqyndy sý aǵyzǵan kompanııa jaýapqa tartylmaq

AQTAÝ. QazAqparat - Mańǵystaý oblysy boıynsha Ekologııa departamenti Aqtaý qalasyndaǵy «Aktau tourism city ltd» kompanııasynyń fılıalyna qatysty Kaspıı teńizi men Qarakól kóline sarqyndy sýlardy aǵyzý faktisi boıynsha jospardan tys tekserý júrgizdi. Bul týraly QazAqparat Ekologııa mınıstrligine silteme jasap habarlaıdy.

Tekserý barysynda sarqyndy sýlardy aǵyzý faktisi rastalyp, QR Ekologııalyq kodeksiniń 222-baby 8-tarmaǵynyń talaptary buzylǵany anyqtaldy.

Búgingi tańda kompanııa dıhlorlanǵan basseındik sý jiberý qubyryn bólshektedi, ekinshi qubyrdy bólshekteý jumystary júrgizilýde. Bul sharalar Ekologııa departamentimen berilgen nusqamalar sheńberinde atqaryldy.

Kompanııa basseındik sý men tuşylandyrý qondyrǵysynda teńiz sýyn tazartqannan keıingi sýdy jiberýdi júzege asyrǵanyn atap ótken jón.

Sonymen qatar, sý synamalaryn taldaý nátıjeleri kórsetkendeı, ólshengen zattar, nıtrattar men hlorıdter boıynsha normatıvterden aýytqýshylyq belgilendi. Bul fakt Ekokodekstiń 39-baby 9-tarmaǵynyń talaptaryna qaıshy.

2021 jylǵy 15 qyrkúıekten bastap KTQ boıynsha tehnıkalyq problemalarǵa baılanysty kompanııa sarqyndy sýdy bıologııalyq turǵydan tazartýdy júrgizgenbegen. Osylaısha, Kodekstiń 393-baby 1-tarmaǵynyń talaptary men jobalyq sheshimder saqtalmaǵan.

Tekserý nátıjeleri boıynsha «Aktau tourism city ltd» kompanııasyna qatysty QR Ákimshilik quqyq buzýshylyq týraly kodeksiniń 324, 325, 326, 328, 331, 332 baptary boıynsha 6 ákimshilik is qozǵaldy.

Ekologııa departamenti «Mańǵystaý oblysynyń Tabıǵı resýrstar jáne tabıǵat paıdalanýdy retteý basqarmasy» MM-ne kompanııaǵa buǵan deıin berilgen qorshaǵan ortaǵa emıssııa berý ruqsatyn keri qaıtaryp alý máselesi boıynsha hat joldady.