Kaspıı teńizi qazaqstandyq akvatorııasynyń soltústik bóligi tartylyp barady
«Qazaqstan Ǵarysh Sapary» UK» AQ-nyń baspasóz qyzmetinen málim etkendeı, ǵaryshtan júrgizilgen monıtorıng Kaspıı teńiziniń tartylý aýqymyn kórsetip otyr.
«Tarıhı kezeń ishindegi (15 jyl) ártúrli ýaqyttaǵy ǵaryshtyq túsirilim derekteri boıynsha Kaspıı teńiziniń jaǵdaıyna monıtorıng júrgizildi. Ǵaryshtyq túsirilimderdiń muraǵat derekterine sáıkes, Qazaqstan akvatorııasynyń soltústik bóliginde teńiz túbi kórindi. Kaspıı teńizi tartylyp barady. Jerdi qashyqtyqtan zondtaý derekteri boıynsha sońǵy 15 jylda Kaspıı teńiziniń Qazaqstandyq sektorynyń akvatorııasy aıtarlyqtaı (7,1%-ǵa) qysqardy», -dep habarlady kompanııanyń baspasóz qyzmeti.
Kompanııa Qazaqstan Respýblıkasynyń shekarasynda 2008-2023 jyldar aralyǵyndaǵy sý betiniń aýdanyndaǵy ózgerister dınamıkasyn jarııalady.
Teńizdiń Qazaqstan bóligindegi Atyraý qalasyna jaqyn jerde (Jaıyq ózeniniń atyraby) keń tartylǵan aýdandary baıqalady.
«Kaspıı teńiziniń qazaqstandyq sektorynyń sý beti aýdany 2008 jyly 113 866,67 sharshy shaqyrymdy, 2023 jyly bul kórsetkish 105 745,23 sharshy shaqyrymdy qurady. 15 jyl ishinde ártúrli ýaqytta túsirilgen ǵaryshtyq sýretterdiń analızi sý beti aýdanynyń azaıǵanyn anyqtady. Biraq, teńiz deńgeıi tómendegeni de múmkin, bul jan-jaqty keshendi zertteýdi qajet etedi. Kaspıı teńizi deńgeıiniń tómendeýi ekojúıege de, teńiz sharýashylyǵyna da áser etetin birqatar jaǵymsyz saldarǵa ákelýi múmkin. JQZ málimetterine sáıkes eń osal oryn Atyraý qalasyna jaqyn jerdegi Kaspıı teńiziniń qazaqstandyq bóligi bolyp tabylady», -dep málim etti baspasóz qyzmeti.
Eske sala ketelik, budan buryn Kaspıı jaǵalaýyndaǵy qamys órtine 500 tonna sý tógilgenin, ot oshaǵy áli byqsyp jatqanyn jazǵan edik.
