Kaspıı tabany arqyly ótetin optıkalyq kabeldiń úlgisi ázirlenip jatyr

ASTANA. KAZINFORM — «Qazaqtelekom» aktsıonerlik qoǵamynyń basqarma tóraǵasy Baǵdat Mýsın Úkimet otyrysynda Kaspıı tabany arqyly tartylatyn optıkalyq kabel qashan ázirlenip bitetinin málim etti. 

— 2025 jyly Kaspıı túbimen optıkalyq kabel tóseýge baǵyttalǵan strategııalyq jobany iske asyryp bastadyq. Bas merdiger tańdaldy, ol qytaılyq iri kompanııa. Qazaqstan men Ázerbaıjan tarapynan teńiz zertteýleri de aıaqtaldy. Kabeldiń jobalyq úlgisi ázirlenip, zaýytta synaqtar júrgizilip jatyr. Tıisti qural-jabdyqtar satyp alyndy, — dedi ol.

Aıtýynsha, kabeldi tóseý jumystary 2026 jyldyń jazynda aıaqtalýy kerek.

— Jaqynda zaýytta kabeldi qurastyrý bastalady. Kelesi jyldyń mamyr aıyna deıin kabel Kaspıı teńizine deıin jetkiziledi. Tóseý jumystaryn jazdyń sońyna deıin aıaqtaýdy josparlap otyrmyz, — dedi Baǵdat Mýsın.

Aıta ketý kerek, Úkimettiń búgingi otyrysynda jylytý maýsymyndaǵy órt qaýipsizdigi sharalary pysyqtalyp jatyr.