Kaspıı sýynyń qyzylǵa boıalý sebebi anyqtaldy

AQTAÝ. QazAqparat - Sońǵy kúnderi Aqtaý qalasynyń turǵyndary teńiz sýynyń shamaly bóliginiń qyzyl túske boıalǵanyn baıqaǵan. Buǵan Kaspııdegi sý asty baldyrlary sebep bolǵan, dep habarlaıdy QazAqparat tilshisi.

Bul týraly Mańǵystaý oblystyq ekologııa departamenti basshysynyń orynbasary Rýslan Túkenov aıtty.

Onyń aıtýynsha, zertteý-saraptama bóliminiń mamandary teńiz sýy jáne baldyr synamasyn alyp, qazir taldaý jumystaryn júrgizip jatyr.

«Qyzyl baldyrdyń sýǵa qyzyl reń berip turǵany ońaı baıqalady. Túsi ózgergen sý kólemi qalanyń 1-shi shaǵyn aýdanynda ornalasqan «Shaǵala» qonaqúıinen Prımorskıı turǵyn úı aýmaǵyna deıin 2 shaqyrymǵa sozylady. Odan keler eshqandaı qaýip joq. Kádimgi tabıǵı qubylys. Daýyl turǵan kezde qyzyl baldyr jaǵaǵa jınalady»,-dedi Rýslan Túkenov.

Qyzyl baldyrlar teńizderde sý asty jartastaryna, rıfterge, úlkendi-kishili domalaq, qıyrshyq tastarǵa, qumǵa, al maıda túrleri iri baldyrlarǵa jabysyp ósedi.

Negizinen 20 - 40 m, al qolaıly jaǵdaılarda 100 - 200 m tereńdikte ósedi. Keıbir túrleri ǵana tuşy sýlarda kezdesedi. 2 klasqa (bangııa, florıdııa), 600-den asatyn týysqa jatatyn 4 myńnan astam túrleri bar.

Kaspıı teńizinde qyzyl baldyrdyń 25 túri  kezdesedi.

Eske sala keteıik, buǵan deıin Aqtaýda teńiz qyzyl túske boıalǵandyǵy týraly buǵan deıin habarlaǵan bolatynbyz.