Kaspıı nege taıazdanyp barady — sebebin Nysanbaev atady

ASTANA. KAZINFORM — Ekologııa jáne tabıǵı resýrstar mınıstri Erlan Nysanbaev Kaspıı teńiziniń jaı-kúıine qatysty pikir bildirdi.

Onyń aıtýynsha, sý deńgeıiniń tómendeýi jáne sýdyń lastanýy syndy eki bólek máseleni ajyrata bilý qajet:

— Kaspııdiń sý deńgeıiniń tómendeýine baılanysty teńizdiń jaı-kúıi — bir másele. Al onyń sýynyń lastanýy múlde basqa másele. Sońǵy jyldary sýdyń sapasynyń apatty jaǵdaıyna baılanysty búkil flora men faýnanyń joıylyp ketkeni týraly aqparat bolyp pa edi?! Tek ıtbalyqtarǵa qatysty jergilikti jaǵdaı tirkeldi. Biraq ol juqpaly aýrý bolatyn. Mundaı qorytyndyny tıisti ǵylymı-tehnıkalyq ınstıtýttar jasady. Al sý deńgeıiniń tómendeýi — bul da qazirgi tańda qarastyrylyp jatqan másele. Bul - adam áreketiniń nátıjesi. Sý qajetti mólsherden kóp alynyp jatyr, — dedi Nysanbaev Májilistegi brıfıngte.

Buǵan deıin áleýmettik jelilerde Kaspıı teńizi jaǵalaýynda aqqýlardyń qyrylǵany týraly aqparat taraýyna baılanysty Mańǵystaý oblystyq ekologııa departamentiniń zerthanalyq-taldamalyq baqylaý bóliminiń mamandary teńiz sýynan synama alyp, zertteý júrgizgenin jazǵan edik.