Kaspıı munaı qubyr kesheninde jóndeý jumystary tolyq aıaqtaldy

ASTANA. QazAqparat – Kaspıı qubyr konsortsıýmynda teńiz termınalyndaǵy ekinshi aılaq qurylǵysynda qalqymaly jabdyqtardy aýystyrý jumystary tolyq aıaqtaldy. Bul týraly atalǵan konsortsıýmnyń baspasóz qyzmeti málim etti, dep habarlaıdy QazAqparat tilshisi.

«2022 jyldyń 29 qarashasynda ekinshi aılaq qurylǵysynda qalqymaly jabdyqty aýystyrý jumystary tolyǵymen aıaqtaldy. Gıdrostatıkalyq synaqtar tıisti deńgeıde júrgizildi. Osy oraıda atalǵan qurylǵy munaıdy tankerlerge tıeýge daıyn», - delingen Kaspıı qubyr konsortsıýmy málimetinde.

Budan buryn habarlanǵandaı, bıyl qarasha aıynda Kaspıı qubyr konsortsıýmynyń teńiz termınalyndaǵy birinshi qurylǵysy jóndeldi.

Odan keıin birden ekinshi qondyrǵyny jóndeý bastaldy.

Aıta keteıik, 22 tamyzda Kaspıı qubyr jelisiniń eki kesheni tehnıkalyq aqaýlarǵa baılanysty jumys istemeı turǵany habarlanǵan edi.

Foto: svetland-oil.kz