Kaspıı máselesi Bakýdegi álemdik forýmda kóterildi
ASTANA. KAZINFORM — Ázerbaıjannyń astanasy Baký qalasynda qalalardyń bolashaǵy, ekologııa jáne turaqty damý máselelerine arnalǵan álemdegi eń iri halyqaralyq alańdardyń biri — 13-shi Dúnıejúzilik qalalyq forým (WUF13, World Urban Forum) ótti. Bul týraly «Jańa adamdar» jastar qozǵalysy málim etti.
Forýmǵa álemniń 182 elinen ókilder, halyqaralyq uıymdar, sarapshylar, úkimet jáne azamattyq qoǵam músheleri qatysty.
— Forým aıasynda «Climate Resilient Cities and Communities across the Caspian Region: Unlocking Climate Finance for Urban Adaptation» atty ekologııalyq sessııada Jańa adamdardyń AntiTrash azamattyq naýqanynyń ókilderi Kaspıı teńizi máselesin kóterdi. Kaspıı óńirindegi klımatqa tózimdi qalalar týraly talqylaý adamnyń tabıǵatqa, elge jáne aınalasyndaǵy ortaǵa degen jaýapkershiligi týraly taqyrypqa aınaldy, — delingen habarlamada.
Osyǵan deıin Jańa adamdar Qazaqstan ishinde Kaspıı máselesin kótergen bolatyn. Belsendiler Aqtaýdaǵy teńiz jaǵalaýynda Kaspıı mańyndaǵy barlyq memleketterge úndeý jasap, ekologııalyq bastamalar ótkizdi jáne óńirlik ekologııalyq sammıtte teńizdiń saqtalýy máselesin talqylady. Búginde bul taqyryp Bakýde ótken halyqaralyq deńgeıde jalǵasyn tapty.
— Búginde Kaspıı máselesi halyqaralyq kún tártibinde jıi aıtyla bastady. Qazaqstan Prezıdenti Qasym-Jomart Toqaev teńizdi saqtaý máselesin el ishinde, halyqaralyq alańdarda birneshe ret kóterdi. Tabıǵatqa janashyr bolý — Qazaqstandaǵy jańa qoǵamdyq sananyń bir bóligine aınalyp, Jańa Halyqtyq Konstıtýtsııada eldiń bolashaǵymen tikeleı baılanysty qundylyq retinde bektildi, — delingen «Jańa adamdar» jastar qozǵalysynyń habarlamasynda.
Turaqty damý tek ınstıtýttar men halyqaralyq uıymdardyń sheshimderi arqyly ǵana qalyptaspaıdy. Naqty ózgerister adamnyń óz eline jáne qorshaǵan ortaǵa jeke jaýapkershilikpen qaraýynan bastalady. Tabıǵatty óz bolashaǵynyń bóligi retinde sezingen kezde ǵana ony qorǵaýǵa jáne damytýǵa degen umtylys paıda bolady.
Osy qaǵıdalardy qoldaý maqsatynda Jańa adamdar forým alańynda Kaspıı teńizine arnalǵan kórkem beıne usyndy. Tolqyn qozǵalysyna uqsas kóılek Kaspıı ekojúıesiniń sımvolyna aınaldy. Sý elementteri men kıim sılýeti teńiz deńgeıiniń tómendeýi, bıoalýantúrliliktiń azaıýy jáne qazirgi ekologııalyq ózgeristerdi beıneleıdi. «Save the Caspian Sea» jazýy adamnyń áreketi men Kaspıı jaǵdaıynyń ózara tyǵyz baılanysyn eske salatyn kórneki belgi boldy.
— Biz Kaspıı taǵdyryna beıjaı qaramaıtyn jandarǵa — jastarǵa, azamattyq qoǵamǵa, Qazaqstan, Ázirbaıjan, Reseı, Túrikmenstan jáne Iranǵa — teńiz biriktiretin barlyq elderge úndeý jasaımyz. Kaspıı taǵdyry árqaısymyzǵa qatysty. Bul — bolashaq urpaq aldyndaǵy ortaq jaýapkershilik, — dedi «Jańa adamdar» jastar qozǵalysynyń ókili Amanov Baýyrjan.
Buǵan deıin óńirlik ekologııalyq sammıtte Kaspıı teńizi máselesi kóterildi.
