«Kaspıı mártebesin aıqyndaý. Bul máselede Qazaqstan usynysy qoldaý tapty» - respýblıkalyq basylymdarǵa sholý

«Egemen Qazaqstan» gazetiniń búgingi nómirinde «Kaspıı mártebesin aıqyndaý. Bul máselede Qazaqstan usynysy qoldaý tapty» degen taqyryppen kólemdi maqala jarııalandy. Onda keshe Ázirbaıjan Respýbılkasynyń astanasy Bakýde ótken Kaspıı jaǵalaýy elderi memleket basshylarynyń úshinshi sammıtinde talqylanǵan máseleler jazylǵan. Basylymnyń jazýynsha, sammıtte sóz sóılegen Elbasy Nursultan Nazarbaev Qazaqstan Kaspıı jaǵalaýy elderine qatysty baryq máselelerdiń tolyq jáne tutastaı sheshilýine mán beretinin, bul jerdegi eń basty másele, Kaspııdiń quqyqtyq mártebesiniń túpkilikti anyqtalýyna tyǵyz baılanysty bolyp turǵany barshaǵa túsinikti ekendigin atap kórsetken. «Kaspıı jaǵalaýy halyqtary arasyndaǵy jemisti yqpaldastyqtyń dostyq rýhynda nyǵaıýy bizdiń elderimizdiń óńirlik yntymaqtastyǵyn jańa belesterge shyǵaratynyna senimdimin», - dep atap kórsetken Qazaqstan basshysy.

«Egemen Qazaqstan» gazetiniń jazýynsha, Premer-Mınıstr Kárim Másimov múddeli ortalyq jáne jergilikti atqarýshy organdar basshylarynyń, sondaı-aq reseılik "Sollers" kompanııasy ókilderiniń qatysýymen Qazaqstanda avtomobıl óndirisin damytý máseleleri boıynsha jumys babyndaǵy keńes ótkizdi. Onda jumys tobynyń Qostanaı qalasynda avtozaýyt óndirisin uıymdastyrý jónindegi usynysy talqylandy. Talqylaý qorytyndysy boıynsha Premer-Mınıstr Qostanaı qalasynda óndiris qýatyn ornalastyrýǵa qajetti alańdy jáne jeńil avtomobılderdiń modeldik úlgilerin anyqtaý boıynsha, sondaı-aq salyq salý jáne memlekettik qoldaý sharalaryn ázirleýge qatysty naqty tapsyrmalar berdi.

***

Qor naryǵy, ıaǵnı baǵaly qaǵazdar aınalymy órkenıetti elder úshin qosymsha tabys kóziniń qyzmetin atqarǵaly qashan. Baǵaly qaǵazdardyń baǵamyn bilgender ter shyǵarmaı-aq, tirnektep jıǵan aqshasyn kiris ákeletin osyndaı qarjy quraldaryna salyp qoıyp, úıinde otyryp-aq paıda kóredi. Sondaı qarjy naryǵyn damytýdyń bizdiń elde de birazdan beri qolǵa alǵanymen, bul sala áli tolyqqandy órken jaıyp kete alǵan joq. Munyń bir sebebi halyqtyń qarjylyq saýatynda jatsa, ekinshi ushy eldegi kásiporyndardyń óz aktsııalaryn qor naryǵyna salýǵa áli daıyn bolmaýynda jatyr. «Alash aınasy» gazetiniń jazýynsha, sol sebepti bolar, endi «Samuryq-Qazyna» qoryna qarasty kompanııalardyń aktsııalary qor naryǵynda halyqqa arnap satylmaq. Bul jańalyqty keshe «Ekspert - 100 - Qazaqstan» ekinshi ekonomıkalyq forýmyna kelip qatysqan Úkimet basshysy K.Másimov jarııa etken. Qarjyńyzdy eseleı túsetin bul tetik jaıynda keńirek bilgińiz kelse, basylymnyń búgingi nómirindegi «Úkimet qor naryǵyn damytý úshin qarymdy qadam jasamaq» degen maqalaǵa nazar salyńyz.

«Eýropa elderindegideı áıelder men erkekterdiń zeınetkerlikke shyǵý jasynyń birdeńgeıliligi bizge úlgi bolýy tıis pe?». «Alash aınasy» gazetiniń turaqty «Oı-kókpar» aıdarynda kóterilgen osy saýalǵa Qazaqstan zeınetaqy qorlary qaýymtastyǵynyń tóraǵasy Aıdar Álibaev pen QR Eńbek jáne halyqty áleýmettik qorǵaý mınıstri Gúlshara Ábdihalyqova jaýap bergen. Bilikti mamandardyń biri «ıá» dep, ekinshisi joq» dep bir-birine kereǵar pikirler bildirgen.

***

«Aıqyn» gazetiniń dástúrli «Aq sóıle!» aıdarynyń búgingi qonaǵy saıasattanýshy Erlan Qarın. Onymen bolǵan suhbat «Alash qaıratkerleri búgingi bılik pen oppozıtsııanyń ýaıymyn túsinbes edi» degen taqyryppen jarııalandy. Elimizdiń EQYU-ǵa tóraǵalyǵy tóńireginde órbigin áńgime barysynda E. Qarın: «Ekinshiden, bul sammıtte 50 eldiń basshysy jınalyp, alystaǵy Gaıtıdegi máselelerdi talqylap jatsa, ondaı áńgimeler túsinikti bolar edi. Biraq aldaǵy sammıtte kún tártibinde negizinen bizge qajet máseleler usynylyp otyr: birinshiden, Aýǵanstandaǵy jaǵdaı, ekinshiden, Qyrǵyzstandaǵy daǵdarysqa baılanysty Ortalyq Azııanyń turaqtylyǵy, úshinshiden, lańkestik, ekstremızmmen kúres, tórtinshiden, qarý-jaraqtardy baqylaý jónindegi kelisimsharttardy qaıtadan qaraý jáne taǵy basqa. Sondyqtan bul sammıtte bizge qajet máseleler bizdiń múddemiz turǵysynan talqylanbaq. Demek, sammıttiń mańyzy óte joǵary», - dep atap kórsetken.

«Kásipqoı bokstan WBA tujyrymy boıynsha 72,3 keli salmaqtaǵy álem chempıony Gennadıı Golovkın 16 jeltoqsan kúni Astana qalasynda óz ataǵyn qorǵaıtyn bolady», - dep jazady «Aıqyn» gazeti. Basylymnyń málimetinshe, Táýelsizdik kúni qazaqstandyq boksshy panamalyq Nelson Hýlıo Tapıaǵa qarsy shyǵady. Bul boksshy osy kúnge deıin 17 jekpe-jek ótkizip, 14 ret jeńiske jetken. 10 qarsylasyn nokaýtqa túsirgen. Eki ret utylyp, 1 márte básekeni teń aıaqtaǵan. Al G. Golovkın bolsa kásipqoı boksqa kelgeli beri sharshy alańǵa 19 ret kóterilip, onyń barlyǵynda da jeńis toıyn toılaǵan.

***

«Kazahstanskıa pravda» gazetinde belgili Reseı saıasatkeri, Reseı Federatsııasy Federaldy Jınalysy Federatsııa Keńesiniń tóraǵasy jáne TMD Parlamentaralyq Assambleıasynyń uzaq jyldardan bergi jetekshisi Sergeı Mıronovtan alynǵan suhbat «Provedenıe sammıta -sýdbonosnaıa ınıtsıatıva Kazahstana» degen taqyryppen basyldy. Gazet tilshisiniń saýaldaryna egjeı-tegjeıli jaýap bergen reseılik saıasattanýshy: «Qazaqstan tóraǵalyǵynyń mańyzdy bir qadamy retinde ultaralyq jáne mádenıetaralyq únqatysýlardy ilgeri jyljytýy bolǵanyn atap kórsetken abzal. Osy arada Qazaqstannyń Eýrazııanyń kindiginde, álemniń kóne órkenıetteriniń toǵysynda, ıaǵnı Shyǵys pen Batys arasyndaǵy kópjaqty baılanystar ortalyǵynda ornalasqan ǵajaıyp geografııalyq jaǵdaıyn eske túsirgen de oryndy. Degenmen, men Qazaqstan tóraǵalyǵynyń basty naqyshy, eń mańyzdy jáne múmkin taǵdyrsheshti bastamalarynyń biri dep Nursultan Nazarbaevtyń ústimizdegi jyldyń 1-2 jeltoqsanynda Astana Sammıtin ótkizý týraly usynysyn esepteımin. Bul Sammıt 10 jyldan astam ýaqyt bas qospasa, endi ol Helsınkı úderisin damytýǵa jańa serpin qosady dep senemin», - deıdi.